അങ്ങോട്ട് പോവാൻ നോക്കിയത് നടന്നില്ല,മെസ്സിയെ ഇങ്ങോട്ട് എത്തിച്ചു : നെയ്മർ തുറന്ന് പറയുന്നു!

ഫുട്ബോൾ ലോകത്തെ പ്രശസ്തമായ കൂട്ടുകെട്ടുകളിലൊന്നാണ് നെയ്മർ ജൂനിയർ-ലയണൽ മെസ്സി സഖ്യം.2013-ൽ നെയ്മർ എഫ്സി ബാഴ്സലോണയിൽ എത്തിയതോട് കൂടിയാണ് ഈയൊരു സൗഹൃദം ഉടലെടുത്തത്.2017-ൽ നെയ്മർ ബാഴ്സ വിടും വരെ ഇരുവരും ഒരുമിച്ച് ഒരുപാട് നേട്ടങ്ങൾ കരസ്ഥമാക്കി.പിന്നീട് നെയ്മർ പിഎസ്ജിയിൽ എത്തുകയായിരുന്നു.

നാല് വർഷങ്ങൾക്കുശേഷം ഈ കൂട്ടുകെട്ട് വീണ്ടും ഉടലെടുത്തു.ഈ സീസണിൽ മെസ്സി ബാഴ്സ വിട്ട് പിഎസ്ജിയിൽ എത്തിയതോട് കൂടിയാണ് നെയ്മറും മെസ്സിയും ഒരിക്കൽക്കൂടി ഒരുമിച്ചത്.ഇതുമായി ബന്ധപ്പെട്ട അനുഭവങ്ങളിപ്പോൾ നെയ്മർ ജൂനിയർ പങ്കുവെച്ചിട്ടുണ്ട്. കഴിഞ്ഞദിവസം റൊണാൾഡോ ഫിനോമിനയുടെ പോഡ്കാസ്റ്റിൽ സംസാരിക്കുകയായിരുന്നു താരം. നെയ്മറുടെ വാക്കുകൾ ഇങ്ങനെയാണ്.

” ഞാനും മെസ്സിയും വളരെയധികം അടുത്ത സുഹൃത്തുക്കളാണ്.ബാഴ്സയിൽ എത്തിയ അന്ന് മുതൽ ഞങ്ങൾ തമ്മിൽ കരുത്തുറ്റ ഒരു സൗഹൃദബന്ധം പടുത്തുയർത്തിയിരുന്നു. കഴിഞ്ഞവർഷം ഒരിക്കൽ കൂടി ഒരുമിച്ച് കളിക്കുന്നതിനെ പറ്റി ഞങ്ങൾ സംസാരിച്ചിരുന്നു. അതിനു മുൻപ് ഞാൻ ബാഴ്സയിലേക്ക് മടങ്ങാൻ വേണ്ടിയുള്ള എല്ലാ ശ്രമങ്ങളും നടത്തിയിരുന്നു.എന്നാൽ അതൊന്നും ഫലം കണ്ടിരുന്നില്ല.എന്നാൽ മെസ്സിക്ക് ഇങ്ങോട്ട് വരാനുള്ള ഒരു അവസരം ലഭിച്ചു. അദ്ദേഹത്തെ സ്വന്തമാക്കാൻ ഞങ്ങൾക്ക് കഴിഞ്ഞു. മെസ്സി ഇന്ന് ഇവിടെ ഉള്ളതിൽ ഞാൻ വളരെയധികം ത്രില്ല്ഡാണ്. ഫുട്ബോൾ എനിക്ക് നൽകിയ ഒരു സുഹൃത്താണ് മെസ്സി. കളത്തിനകത്തും പുറത്തും ഞങ്ങളൊരുമിച്ചാണ് മുന്നോട്ടു പോവുന്നത്.ഇപ്പോൾ പിഎസ്ജിക്കൊപ്പം ചരിത്രം കുറിക്കാനാവുമെന്ന് ഞങ്ങൾ പ്രതീക്ഷിക്കുന്നു. ഭാവിയിൽ എന്താണ് സംഭവിക്കുന്നതെന്ന് കാത്തിരുന്ന് കാണാം. ഞങ്ങൾ നന്നായി ഹാർഡ് വർക്ക് ചെയ്യുന്നുണ്ട് ” ഇതാണ് നെയ്മർ പറഞ്ഞത്.

കഴിഞ്ഞ നാന്റെസിനെതിരെ ലീഗ് വണ്ണിൽ നടന്ന മത്സരത്തിൽ ഇരുവരും പിഎസ്ജിക്ക് വേണ്ടി കളിച്ചിരുന്നു. എന്നാൽ ആ മത്സരത്തിൽ ഒരു വമ്പൻ തോൽവി പിഎസ്ജിക്ക് ഏൽക്കേണ്ടി വരികയും ചെയ്തിരുന്നു.