ലൈംഗിക അതിക്രമം: അർജന്റീനയുടെ വേൾഡ് കപ്പ് ഹീറോ മൊണ്ടീലിനെതിരെ ആരോപണം!

കഴിഞ്ഞ ഖത്തർ വേൾഡ് കപ്പ് ഫൈനലിൽ ഫ്രാൻസിനെതിരെ അവസാന പെനാൽറ്റി ഗോളാക്കി മാറ്റിക്കൊണ്ട് അർജന്റീനയുടെ ഹീറോയായ താരമാണ് ഡിഫൻഡർ ആയ ഗോൺസാലോ മോണ്ടിയേൽ. അർജന്റീന സമീപകാലത്ത് 3 കിരീടങ്ങൾ നേടിയപ്പോൾ അതിൽ മൂന്നിലും പങ്കാളിയാവാൻ ഇദ്ദേഹത്തിന് കഴിഞ്ഞിരുന്നു. അവസാനമായി അർജന്റീന കളിച്ച കുറസാവോക്കെതിരെയുള്ള മത്സരത്തിലും അദ്ദേഹം ഗോൾ നേടിയിരുന്നു.

എന്നാൽ ഈ അർജന്റീന സൂപ്പർതാരത്തിനെതിരെ ഇപ്പോൾ ലൈംഗിക അതിക്രമ ആരോപണം ഉയർന്നിട്ടുണ്ട്. 2019 ജനുവരി ഒന്നാം തീയതിയാണ് ഈ അതിക്രമം അരങ്ങേറിയിട്ടുള്ളത് എന്നാണ് ഇര ആരോപിക്കുന്നത്.മോന്റിയേലിന്റെ ബർത്ത് ഡേ പാർട്ടിക്ക് അദ്ദേഹവുമായി ചെറിയ അടുപ്പമുള്ള ഒരു സ്ത്രീയെ താരം ക്ഷണിച്ചിരുന്നു. അവർ ആ ബർത്ത് ഡേ പാർട്ടിയിൽ പങ്കെടുക്കുകയും പൊതുവേ മദ്യപിച്ച് ശീലമില്ലാത്ത അവർ മദ്യപിക്കുകയും ചെയ്തിരുന്നു.

തുടർന്ന് അബോധാവസ്ഥയിലേക്ക് പോയ തന്നെ മോന്റിയേൽ ലൈംഗികമായി ആക്രമിച്ചു എന്നാണ് ഇവർ ആരോപിച്ചിരിക്കുന്നത്.മോന്റിയേലിന്റെ സുഹൃത്തുക്കൾക്കും ഇതിൽ പങ്കുണ്ടെന്ന് ഇവർ ആരോപിച്ചിട്ടുണ്ട്. വക്കീൽ മുഖാന്തരമാണ് ഈ ആരോപണങ്ങൾ ഉയർന്നു വന്നിട്ടുള്ളത്. ഈ വിഷയത്തിൽ താരം യാതൊരുവിധ പ്രതികരണങ്ങളും നടത്തിയിട്ടില്ല.

ഏതായാലും അന്വേഷണങ്ങൾക്ക് ശേഷം മാത്രമാണ് താരം കുറ്റക്കാരൻ ആണോ അല്ലയോ എന്നുള്ളത് വ്യക്തമാവുകയുള്ളൂ. എന്നാൽ പരാതികൾ ഒന്നും ലഭിച്ചിട്ടില്ല എന്നാണ് ചില വൃത്തങ്ങൾ റിപ്പോർട്ട് ചെയ്യുന്നത്. പ്രമുഖ മാധ്യമമായ മാർക്ക ഈ ആരോപണം ഇപ്പോൾ റിപ്പോർട്ട് ചെയ്തിട്ടുണ്ട്. 2016 മുതൽ 2021 വരെ അർജന്റീന ക്ലബ്ബായ റിവർ പ്ലേറ്റിന്റെ താരമായിരുന്നു ഇദ്ദേഹം.