മത്സരത്തെ സമീപിച്ചത് പൂർണ്ണഗൗരവത്തോടെ, ഉജ്ജ്വലവിജയത്തിന് ശേഷം നായകൻ കാസമിറോ പറയുന്നു !

മത്സരത്തെ ഒരിക്കലും ലളിതമായി സമീപിച്ചിട്ടില്ലെന്നും മറിച്ച് പൂർണ്ണഗൗരവത്തോടെ തന്നെയാണ് ബൊളീവിയയെ നേരിട്ടതെന്നും ബ്രസീലിയൻ നായകൻ കാസമിറോ. ഇന്ന് രാവിലെ നടന്ന വേൾഡ് കപ്പ് യോഗ്യത റൗണ്ട് മത്സരത്തിൽ ബൊളീവിയയെ എതിരില്ലാത്ത അഞ്ച് ഗോളുകൾക്ക്‌ തറപ്പറ്റിച്ച ശേഷം സംസാരിക്കുകയായിരുന്നു അദ്ദേഹം. മത്സരത്തിൽ ഗംഭീരപ്രകടനം നടത്തിയ ബ്രസീലിന് നിരവധി ഗോളവസരങ്ങൾ ലഭിച്ചിരുന്നു. മത്സരത്തിൽ ഒരിക്കൽ പോലും ഞങ്ങൾ കളിക്കാനാഗ്രഹിക്കാത്ത സമയമുണ്ടായിട്ടില്ലെന്നും നൂറ് ശതമാനവും ഗൗരവത്തോടെ തന്നെയാണ് മത്സരത്തിൽ കളിച്ചതെന്നും കാസമിറോ വെളിപ്പെടുത്തി. മറ്റൊരു താരമായ റെനാൻ ലോദിയും മത്സരത്തെ കുറിച്ചുള്ള അനുഭവങ്ങൾ പങ്കുവെച്ചു. ബ്രസീലിന്റെ ജേഴ്സി അണിയുന്നത് പ്രത്യേകതകൾ നിറഞ്ഞതാണെന്നും തന്നെ സ്വീകരിച്ച എല്ലാവർക്കും നന്ദി അർപ്പിക്കുന്നുവെന്നും ലോദി അറിയിച്ചു.

” ഏറ്റവും പ്രധാനപ്പെട്ട കാര്യവും ഏറ്റവും മൂല്യം കല്പിക്കുന്ന കാര്യവും എന്തെന്ന് വെച്ചാൽ, ഇന്നത്തെ മത്സരത്തെ ഞങ്ങൾ എത്രത്തോളം ഗൗരവത്തോടെ സമീപിച്ചു എന്നുള്ളതാണ്. മത്സരത്തിൽ ഒരിക്കൽ പോലും ഞങ്ങൾ കളിക്കാനാഗ്രഹിക്കാതെ നിന്നിട്ടില്ല. എല്ലാ ബഹുമാനത്തോടെയും പറയട്ടെ.. ഇത് ഫുട്ബോളാണ്. നിങ്ങൾക്ക്‌ അവസരം ലഭിച്ചു കഴിഞ്ഞാൽ അത് മുതലെടുക്കുക. ഈ മത്സരത്തെ ഞങ്ങൾ സമീപിച്ചത് നൂറ് ശതമാനവും ഗൗരവത്തോടെയാണ് ” കാസമിറോ പറഞ്ഞു. ” ഞാൻ എന്നെ നല്ല രീതിയിൽ സ്വീകരിച്ച എല്ലാവരോടും നന്ദി പറയുന്നു. ഈ ജേഴ്സി അണിയുന്നത് തന്നെ വളരെ പ്രത്യേകതയുള്ളതാണ്. ഇതണിയുമ്പോൾ തന്നെ സ്വാഭാവികമായും നമ്മുടെ മികച്ച പ്രകടനം പുറത്തേക്ക് വരും ” മത്സരത്തിലെ തകർപ്പൻ പ്രകടനത്തിന് ശേഷം റെനാൻ ലോദി അറിയിച്ചു.