2026 ലോകകപ്പ്: പോരാട്ടഭൂമിക്ക് മുൻപ് താവളമുറപ്പിച്ച് ടീമുകൾ; ഫിഫ ബേസ് ക്യാമ്പുകൾ പ്രഖ്യാപിച്ചു

       ഏറ്റവും വലിയ കായിക മാമാങ്കത്തിന് കിക്കോഫ് കുറിക്കാൻ ഇനി അധികനാൾ ബാക്കിയില്ല. യു.എസ്.എ, കാനഡ, മെക്സിക്കോ എന്നീ മൂന്ന് രാജ്യങ്ങൾ സംയുക്തമായി ആതിഥേയത്വം വഹിക്കുന്ന, ചരിത്രത്തിലാദ്യമായി 48 ടീമുകൾ മാറ്റുരയ്ക്കുന്ന 2026 ഫിഫ ലോകകപ്പിന്റെ ബേസ് ക്യാമ്പുകൾ ഫിഫ ഔദ്യോഗികമായി പ്രഖ്യാപിച്ചു. ഗ്രൂപ്പ് ഘട്ട മത്സരങ്ങൾക്കായി കളിക്കാർ എവിടെ തങ്ങണമെന്നും എവിടെ പരിശീലിക്കണമെന്നുമുള്ള കാര്യത്തിലാണ് ഇപ്പോൾ അന്തിമ തീരുമാനമായിരിക്കുന്നത്.
ഏറ്റവും ഒടുവിലായി ഇറാന്റെ ബേസ് ക്യാമ്പ് അമേരിക്കയിൽ നിന്നും മെക്സിക്കോയിലെ ടിജുവാനയിലേക്ക് മാറ്റിയതോടെയാണ് 48 ടീമുകളുടെയും ക്യാമ്പുകളുടെ കാര്യത്തിൽ വ്യക്തത വന്നത്. എങ്കിലും ഇറാന്റെ ആദ്യ മൂന്ന് മത്സരങ്ങളുടെ വേദികളിൽ മാറ്റമുണ്ടാകില്ലെന്ന് ഫിഫ സ്ഥിരീകരിച്ചിട്ടുണ്ട്.



     വരാനിരിക്കുന്ന ലോകപോരാട്ടത്തിനായി പ്രമുഖ ടീമുകൾ തങ്ങളുടെ ക്യാമ്പുകൾ വ്യത്യസ്ത നഗരങ്ങളിലാണ് ക്രമീകരിച്ചിരിക്കുന്നത്. സൂപ്പർ ടീമുകളുടെ പ്രധാന ബേസ് ക്യാമ്പുകൾ താഴെ പറയുന്നവയാണ്:

അർജന്റീന: നിലവിലെ ചാമ്പ്യന്മാരായ മെസ്സിയും സംഘവും കൻസാസ് സിറ്റിയിലെ ‘സ്പോർട്ടിങ് കെ.സി ട്രെയിനിങ് സെന്റർ’ ആണ് തങ്ങളുടെ താവളമാക്കിയിരിക്കുന്നത്.

ബ്രസീൽ: കനലുകളിൽ നിന്ന് കരുത്തുനേടാൻ മഞ്ഞപ്പട ന്യൂയോർക്ക്/ന്യൂജേഴ്‌സിയിലെ ‘കൊളംബിയ പാർക്ക് ട്രെയിനിങ് ഫെസിലിറ്റി’ തിരഞ്ഞെടുത്തിരിക്കുന്നു.

ഫ്രാൻസ്: മുൻ ചാമ്പ്യന്മാരായ ഫ്രാൻസ് ബോസ്റ്റണിലെ ‘ബെന്റ്ലി യൂണിവേഴ്സിറ്റി’ കേന്ദ്രീകരിച്ചാകും തന്ത്രങ്ങൾ മെനയുക.

ഇംഗ്ലണ്ട്: കൻസാസ് സിറ്റിയിലെ പ്രശസ്തമായ ‘സ്വോപ്പ് സോക്കർ വില്ലേജ്’ ആണ് ഇംഗ്ലീഷ് പടയുടെ ക്യാമ്പ്.

ജർമ്മനി: വിൻസ്റ്റൺ-സേലമിലെ ‘വേക് ഫോറസ്റ്റ് യൂണിവേഴ്സിറ്റി’ ആണ് ജർമ്മനിയുടെ പരിശീലന കേന്ദ്രം.

പോർച്ചുഗൽ: പാം ബീച്ച് ഗാർഡൻസിലെ ‘ഗാർഡൻസ് നോർത്ത് കൗണ്ടി ഡിസ്ട്രിക്റ്റ് പാർക്ക്’ ആണ് പോർച്ചുഗലിന്റെ ക്യാമ്പ്.



     ആതിഥേയ രാജ്യങ്ങളായ യു.എസ്.എ, കാനഡ, മെക്സിക്കോ എന്നിവർ സ്വന്തം നാട്ടിലെ മികച്ച സൗകര്യങ്ങളാണ് ഒരുക്കിയിട്ടുള്ളത്. യു.എസ്.എ ഇർവിനിലെ ‘ഗ്രേറ്റ് പാർക്ക് സ്പോർട്സ് കോംപ്ലക്സിലും’, കാനഡ വാൻകൂവറിലെ ‘നാഷണൽ സോക്കർ ഡെവലപ്‌മെന്റ് സെന്ററിലും’, മെക്സിക്കോ മെക്സിക്കോ സിറ്റിയിലെ ‘സെൻട്രോ ഡി ആൾട്ടോ റെൻഡിമിന്റോ’യിലുമാകും ക്യാമ്പ് ചെയ്യുക.
യൂണിവേഴ്സിറ്റി ക്യാമ്പസുകൾ, പ്രമുഖ എം.എൽ.എസ് (MLS) ക്ലബുകളുടെ അത്യാധുനിക പരിശീലന കേന്ദ്രങ്ങൾ, പ്രശസ്തമായ സ്പോർട്സ് കോംപ്ലക്സുകൾ എന്നിവയാണ് ഭൂരിഭാഗം ടീമുകളും തങ്ങളുടെ താവളമായി തിരഞ്ഞെടുത്തിരിക്കുന്നത്. അത്യാധുനിക സൗകര്യങ്ങളുള്ള ഈ ക്യാമ്പുകളിൽ കഠിനമായ പരിശീലനങ്ങളിലൂടെയാകും ടീമുകൾ ലോകകപ്പ് കിരീടത്തിലേക്കുള്ള തന്ത്രങ്ങൾ മെനയുക. പ്രഖ്യാപനം പൂർത്തിയായതോടെ ആരാധകരും ഇനി തങ്ങളുടെ പ്രിയപ്പെട്ട ടീമുകളെ വരവേൽക്കാനുള്ള കാത്തിരിപ്പിലാണ്.