സ്വപ്നമുഹൂർത്തത്തിന് വഴിയൊരുങ്ങുന്നു: ബ്രസീലിയൻ പട ഇന്ത്യയിലേക്ക്?

     ഇന്ത്യയിലെ കോടിക്കണക്കിന് വരുന്ന ഫുട്ബോൾ ആരാധകർക്ക് ആവേശം പകരുന്ന വാർത്തയാണ് പുറത്തുവരുന്നത്. ബ്രസീലിയൻ ഫുട്ബോൾ ഫെഡറേഷൻ (CBF) അവരുടെ സീനിയർ ടീമിന്റെ ഒരു സൗഹൃദ മത്സരം ഇന്ത്യയിൽ നടത്തുന്നതിനായി ചർച്ചകൾ ആരംഭിച്ചിരിക്കുന്നു.

     ഒക്ടോബർ ആദ്യ വാരമായിരിക്കും മത്സരം നടക്കുക. വേദി കൊൽക്കത്തയാണ്.ഇതിന് മുന്നോടിയായി സെപ്റ്റംബർ 25, 29 തീയതികളിൽ ഓസ്ട്രേലിയയിൽ വെച്ച് ഓസ്ട്രേലിയൻ ടീമുമായി ബ്രസീൽ മാറ്റുരയ്ക്കും. തുടർന്ന് കൊൽക്കത്തയിലെത്തി മൂന്നാമത്തെ മത്സരം കളിക്കാനാണ് പദ്ധതി.ഇന്ത്യയിൽ നടക്കുന്ന മത്സരത്തിൽ ബ്രസീലിന്റെ എതിരാളികൾ ആരായിരിക്കും എന്ന കാര്യത്തിൽ ഇതുവരെ അന്തിമ തീരുമാനമായിട്ടില്ല.

   ഏഷ്യയിൽ ബ്രസീൽ ഫുട്ബോളിനുള്ള വൻ ആരാധകവൃന്ദവും പിന്തുണയും കണക്കിലെടുത്താണ് CBF ഇത്തരം ഒരു നീക്കത്തിന് തയ്യാറെടുക്കുന്നത്. കരാർ നടപടികൾ പൂർത്തിയാകുന്നതോടെ ഔദ്യോഗിക പ്രഖ്യാപനം ഉടൻ ഉണ്ടാകുമെന്നാണ് സൂചന.