മികച്ച കളി മാത്രം പോരാ…! വേൾഡ് കപ്പ് നേടാൻ ഭാഗ്യവും ഐക്യവും വേണം:  തുറന്നുപറഞ്ഞ് സ്കലോനി

     2022ലെ ലോകകപ്പ് നേട്ടത്തിന് പിന്നിലെ രഹസ്യം വെളിപ്പെടുത്തി അർജന്റീന പരിശീലകൻ ലയണൽ സ്കലോനി. “മികച്ച ഫുട്ബോൾ കളിച്ചതുകൊണ്ട് മാത്രം ലോകകപ്പ് നേടാനാവില്ല. അതിനപ്പുറം പല ഘടകങ്ങളും വേണം” എന്നാണ് സ്കലോനിയുടെ തുറന്നുപറച്ചിൽ. 2026 ലോകകപ്പ് അടുക്കുമ്പോൾ നിലവിലെ ചാമ്പ്യൻമാർക്ക് അദ്ദേഹം നൽകുന്ന മുന്നറിയിപ്പ് കൂടിയാണിത്.ഒരു അർജന്റീനിയൻ മാധ്യമത്തിന് നൽകിയ അഭിമുഖത്തിലാണ് സ്കലോനി മനസ്സ് തുറന്നത്. “ലോകകപ്പ് നേടാൻ മികച്ച ടീമും മികച്ച കളിക്കാരും മാത്രം പോരാ. നിങ്ങൾക്ക് ഭാഗ്യം വേണം, ശരിയായ സമയത്ത് ശരിയായ തീരുമാനങ്ങൾ വേണം, ഡ്രസ്സിംഗ് റൂമിൽ പൂർണ്ണ ഐക്യം വേണം. ഏറ്റവും പ്രധാനം, തോൽക്കാൻ മനസ്സില്ലാത്ത ഒരു കൂട്ടം കളിക്കാർ വേണം.” എന്നാണ് അദ്ദേഹം അഭിപ്രായപ്പെട്ടത്. “2022ൽ ഞങ്ങൾ സൗദിക്കെതിരെ തോറ്റപ്പോൾ എല്ലാം തീർന്നെന്ന് കരുതി. പക്ഷേ ആ തോൽവിയാണ് ഞങ്ങളെ ഒന്നിപ്പിച്ചത്. അതൊരു വഴിത്തിരിവായിരുന്നു. ചിലപ്പോൾ തോൽവിയാണ് ഏറ്റവും വലിയ വിജയത്തിലേക്കുള്ള വഴി.” എന്നും അദ്ദേഹം കൂട്ടിച്ചേർത്തു.



    ക്വാർട്ടറിൽ നെതർലൻഡ്സിനെതിരെയും ഫൈനലിൽ ഫ്രാൻസിനെതിരെയും പെനാൽറ്റി ഷൂട്ടൗട്ടിൽ ജയിച്ചതിനെക്കുറിച്ച് സ്കലോനി ഇപ്രകാരമായിരുന്നു പറഞ്ഞത്,  “പെനാൽറ്റി എന്നത് 50-50 ആണ്. അവിടെ ടാക്റ്റിക്സ് മാത്രം പോരാ. എമി മാർട്ടിനെസിന്റെ മികവ്, കൂടെ കുറച്ച് ഭാഗ്യവും. മെസ്സിയുടെ ആ അവസാന മിനിറ്റ് ക്ലിയറൻസ്, മോണ്ടിയേലിന്റെ ആ പെനാൽറ്റി… എല്ലാം കൃത്യം സമയത്ത് സംഭവിക്കണം.” മെസ്സിയില്ലാത്ത ഒരു ലോകകപ്പിന് അർജന്റീന തയ്യാറെടുക്കുമ്പോഴാണ് സ്കലോനിയുടെ ഈ വാക്കുകൾ. “മെസ്സി എന്നത് മെസ്സി തന്നെയാണ്. അയാളെ റീപ്ലേസ് ചെയ്യാനാകില്ല. പക്ഷേ ടീം എന്ന നിലയിൽ നമ്മൾ കൂടുതൽ ശക്തരാകണം. 2022ലെ ആ സ്പിരിറ്റ്, ആ ഐക്യം, ആ ‘തോൽക്കില്ല’ എന്ന വാശി – അതാണ് 2026ലും വേണ്ടത്.”



     ഗാർനാച്ചോ, ബുവോനാനോട്ടെ, എചെവേരി തുടങ്ങിയ യുവതാരങ്ങളോട് സ്കലോനി പറഞ്ഞത് ഇങ്ങനെയാണ്,  “പ്രതിഭ കൊണ്ട് മാത്രം കാര്യമില്ല. സമ്മർദ്ദം താങ്ങാനുള്ള മാനസിക കരുത്ത് വേണം. ദേശീയ ജേഴ്സിയുടെ ഭാരം അറിയണം. 2022ൽ പാരഡെസും ഡി പോളും എൻസോയും കാണിച്ച ആ പോരാട്ടവീര്യം എല്ലാവരും മാതൃകയാക്കണം.” ഖത്തറിലെ കിരീട നേട്ടം യാദൃശ്ചികമല്ലെന്ന് സ്കലോനി ഓർമ്മിപ്പിക്കുന്നു. മികച്ച കളി, കഠിനാധ്വാനം, ടീം സ്പിരിറ്റ്, നിർണായക നിമിഷങ്ങളിലെ ഭാഗ്യം – ഇതെല്ലാം ഒത്തുചേർന്നപ്പോഴാണ് 36 വർഷത്തെ കാത്തിരിപ്പ് അവസാനിച്ചത്. 2026ൽ കിരീടം നിലനിർത്തണമെങ്കിൽ ഇതേ “ഫോർമുല” വീണ്ടും ആവർത്തിക്കണം. സ്കലോനി അത് വ്യക്തമായി പറഞ്ഞുവെക്കുന്നു: “മികച്ച കളി മാത്രം പോരാ… ലോകകപ്പിന് അതിനേക്കാൾ വലുത് വേണം.” ഈ വാക്കുകളെല്ലാം കായികലോകത്ത് ഇപ്പോൾ ചർച്ചയായിരിക്കുകയാണ്.