സൻ്റോസ് വിടുമോ അതോ വിരമിക്കുമോ? ഭാവി പദ്ധതികളെക്കുറിച്ച് പ്രതികരിച്ച് നെയ്മർ
സൻ്റോസ് എഫ്സിയുമായുള്ള നിലവിലെ കരാർ പൂർത്തിയാകുന്നതോടെ നെയ്മർ ജൂനിയർ തന്റെ ഫുട്ബോൾ കരിയർ അവസാനിപ്പിക്കുമോ എന്ന കാര്യത്തിൽ കായികലോകത്ത് വൻ ചർച്ചകളാണ് നടക്കുന്നത്. എന്നാൽ, തന്റെ ഭാവികാര്യങ്ങളിൽ ഇപ്പോഴും വ്യക്തമായൊരു തീരുമാനമെടുത്തിട്ടില്ലെന്നും നിലവിൽ വിരമിക്കലിനെക്കുറിച്ച് ചിന്തിക്കുന്നില്ലെന്നുമാണ് താരം തുറന്നുപറഞ്ഞിരിക്കുന്നത്.
ഇൻസ്റ്റിറ്റ്യൂട്ട് പ്രൊജക്റ്റോ നെയ്മർ ജൂനിയറിന്റെ ലേലത്തിന് മുന്നോടിയായി നൽകിയ അഭിമുഖത്തിലാണ് ബ്രസീലിയൻ സൂപ്പർതാരം മനസ്സ് തുറന്നത്.
ഈ വർഷം ഡിസംബർ വരെയാണ് നെയ്മറിന് സൻ്റോസുമായി കരാറുള്ളത്. അതുവരെ ക്ലബ്ബിൽ തുടർന്ന് തന്റെ പരമാവധി പ്രകടനം നടത്താനാണ് താരത്തിന്റെ തീരുമാനം.”ഇപ്പോൾ വിരമിക്കുന്നതിനെക്കുറിച്ച് ഞാൻ ചിന്തിക്കുന്നില്ല. എത്രനാൾ കൂടി കളിക്കുമെന്ന് അറിയില്ല, എങ്കിലും കളി നിർത്താൻ ഞാൻ ഉദ്ദേശിച്ചിട്ടില്ല,” എന്ന് നെയ്മർ വ്യക്തമാക്കി.
സൻ്റോസിൽ തുടരണമോ, അതോ പുതിയ ക്ലബ്ബിലേക്ക് മാറണമോ, അല്ലെങ്കിൽ കളി അവസാനിപ്പിക്കണമോ എന്നത് ഡിസംബറിലെ കരാർ അവസാനിച്ച ശേഷമേ തീരുമാനിക്കൂ.
2026 ലോകകപ്പ് സമയത്ത് നേരിട്ട പരിക്കുകളിൽ നിന്ന് താരം നിലവിൽ മുക്തനായിരിക്കുകയാണ്. കളിയിൽ കൂടുതൽ സജീവമാകാനും ഫിറ്റ്നസ് വീണ്ടെടുക്കാനും സാധിക്കുന്നതിൽ സന്തോഷമുണ്ടെന്നും അദ്ദേഹം കൂട്ടിച്ചേർത്തു.
