ഫിഫ ലോകകപ്പ് 2026: പന്തുരുളാൻ ഒരു മാസം മാത്രം; ഇന്ത്യയിൽ ആര് സംപ്രേഷണം ചെയ്യും?

  ലോകമെമ്പാടുമുള്ള ഫുട്ബോൾ പ്രേമികൾ കാത്തിരിക്കുന്ന 2026-ലെ ഫിഫ ലോകകപ്പിന് കിക്കോഫ് കുറിക്കാൻ ഇനി വെറും ഒരു മാസം മാത്രം ബാക്കി നിൽക്കെ, ഇന്ത്യയിലെ ആരാധകർ വലിയൊരു അനിശ്ചിതത്വത്തിലാണ്. ലോകകപ്പ് മത്സരങ്ങൾ ഇന്ത്യയിൽ ഏത് ചാനലിൽ അല്ലെങ്കിൽ പ്ലാറ്റ്‌ഫോമിൽ കാണാൻ സാധിക്കുമെന്ന കാര്യത്തിൽ ഫിഫ ഇതുവരെ അന്തിമ തീരുമാനത്തിൽ എത്തിയിട്ടില്ല.



     പ്രമുഖ കായിക മാധ്യമം പുറത്തുവിട്ട വിവരങ്ങൾ പ്രകാരം, സംപ്രേഷണ അവകാശത്തിനായുള്ള മത്സരത്തിൽ നിന്നും സോണി (Sony) പിന്മാറിയിരിക്കുകയാണ്. 20 മില്യൺ ഡോളർ (ഏകദേശം 167 കോടി രൂപ) മൂല്യമുള്ള ഈ മെഗാ ഇവന്റ് വിപണനം ചെയ്യാൻ മതിയായ സമയമില്ല എന്നതാണ് സോണി പിന്മാറാൻ കാരണമായി ചൂണ്ടിക്കാണിക്കുന്നത്. ഇതോടെ റിലയൻസിന്റെ ജിയോ (Jio) ആണ് നിലവിൽ സംപ്രേഷണ അവകാശം നേടാൻ മുൻപന്തിയിലുള്ളത്.
മത്സരങ്ങളുടെ സംപ്രേഷണ അവകാശവുമായി ബന്ധപ്പെട്ട വിലയാണ് (Price) നിലവിലെ പ്രധാന തർക്കവിഷയം. കഴിഞ്ഞ ലോകകപ്പുകളെ അപേക്ഷിച്ച് ഫിഫ ആവശ്യപ്പെടുന്ന തുകയും ഇന്ത്യൻ വിപണിയിലെ സാധ്യതകളും തമ്മിലുള്ള പൊരുത്തക്കേടാണ് ചർച്ചകൾ നീണ്ടുപോകാൻ കാരണം. എന്നിരുന്നാലും, സമയം അതിക്രമിച്ചു കൊണ്ടിരിക്കുന്നതിനാൽ സംപ്രേഷണ തുകയിൽ വിട്ടുവീഴ്ചകൾക്ക് സാധ്യതയുണ്ടെന്നും റിപ്പോർട്ടുകൾ സൂചിപ്പിക്കുന്നു.



     വടക്കേ അമേരിക്കയിൽ (യുഎസ്എ, കാനഡ, മെക്സിക്കോ) നടക്കുന്ന ടൂർണമെന്റ് ആയതിനാൽ ഭൂരിഭാഗം മത്സരങ്ങളും ഇന്ത്യൻ സമയപ്രകാരം പുലർച്ചെയാണ് നടക്കുന്നത്. ഇത് പരസ്യവരുമാനത്തെ ബാധിച്ചേക്കാം എന്ന ആശങ്ക സംപ്രേഷകർക്കുണ്ട്.  ടൂർണമെന്റ് തുടങ്ങാൻ ആഴ്ചകൾ മാത്രം ബാക്കിനിൽക്കെ പരസ്യദാതാക്കളെ കണ്ടെത്തുന്നത് വെല്ലുവിളിയാകും.
ജിയോയുമായുള്ള കരാർ ഉടൻ തന്നെ ഒപ്പിടുമെന്നാണ്  കരുതപ്പെടുന്നത്. അങ്ങനെയെങ്കിൽ ജിയോ സിനിമയിലൂടെയും ,  സ്പോർട്സ് 18 ചാനലിലൂടെയും ഇന്ത്യയിലെ ആരാധകർക്ക് മത്സരങ്ങൾ തത്സമയം കാണാൻ സാധിക്കും. ഔദ്യോഗിക പ്രഖ്യാപനത്തിനായി കാത്തിരിക്കുകയാണ് ഫുട്ബോൾ ലോകം.