ഗോളും അസിസ്റ്റുമായി നെയ്മർ,പിഎസ്ജിക്ക് വിജയം!

ലീഗ് വണ്ണിൽ ഒരല്പം മുമ്പ് നടന്ന മത്സരത്തിൽ നിലവിലെ ചാമ്പ്യൻമാരായ പിഎസ്ജി വിജയം നേടി. ഒന്നിനെതിരെ 2 ഗോളുകൾക്കാണ് പിഎസ്ജി ലോറിയെന്റിനെ പരാജയപ്പെടുത്തിയത്. സൂപ്പർതാരം നെയ്മർ ജൂനിയറാണ് മത്സരത്തിൽ പിഎസ്ജിക്ക് വേണ്ടി തിളങ്ങിയത്. ഒരു ഗോളും ഒരു അസിസ്റ്റുമാണ് നെയ്മർ ജൂനിയർ നേടിയത്.

സൂപ്പർ താരം ലയണൽ മെസ്സിയുടെ അഭാവത്തിലാണ് പിഎസ്ജി ഇന്നിറങ്ങിയത്. പരിക്കു മൂലമാണ് മെസ്സിക്ക് വിശ്രമം അനുവദിച്ചത്.മെസ്സിയുടെ സ്ഥാനത്ത് യുവ താരമായ ഹ്യൂഗോ എകിറ്റിക്കെയായിരുന്നു ഇടം നേടിയിരുന്നത്.ഒമ്പതാം മിനിട്ടിലാണ് നെയ്മറുടെ ഗോൾ പിറന്നത്.എകിറ്റിക്കെയുടെ പാസ് സ്വീകരിച്ച നെയ്മർ ഗോൾ കീപ്പറെയും ഡിഫൻഡർമാരെയും കബളിപ്പിച്ചുകൊണ്ട് ഗോൾ നേടുകയായിരുന്നു.

എന്നാൽ രണ്ടാം പകുതിയുടെ തുടക്കത്തിൽ തന്നെ ലോറിയെന്റ് സമനില നേടുകയായിരുന്നു.എൻസോയുടെ അസിസ്റ്റിൽ നിന്നും മോഫിയാണ് ഗോൾ കണ്ടെത്തിയത്. പിന്നീട് 81ആം മിനിട്ടിലാണ് പിഎസ്ജി തങ്ങളുടെ വിജയഗോൾ കണ്ടെത്തിയത്. നെയ്മറുടെ അസിസ്റ്റിൽ നിന്നും ഡാനിലോ പെരീരയാണ് ഗോൾ നേടിയത്. ഈ ഗോളിലൂടെ പിഎസ്ജി വിജയം ഉറപ്പിക്കുകയായിരുന്നു.

വിജയത്തോടെ ഈ സീസണിലെ അപരാജിത കുതിപ്പ് പിഎസ്ജി തുടരുകയാണ്.മാത്രമല്ല പോയിന്റ് ടേബിളിൽ പിഎസ്ജി ഒന്നാം സ്ഥാനത്ത് തുടരുകയാണ്. 14 മത്സരങ്ങളിൽ നിന്ന് 38 പോയിന്റാണ് പിഎസ്ജി നേടിയിട്ടുള്ളത്.33 പോയിന്റ് ഉള്ള ലെൻസാണ് രണ്ടാം സ്ഥാനത്ത് തുടരുന്നത്.