മെസ്സി പിഎസ്ജിയിൽ, ഔദ്യോഗിക പ്രഖ്യാപനം പിന്നീടെന്ന് ഉടമയുടെ സഹോദരൻ!

ബാഴ്‌സ ഇതിഹാസമായ ലയണൽ മെസ്സിയുടെ അടുത്ത തട്ടകം എവിടെയാണ് എന്നറിയാനുള്ള കാത്തിരിപ്പിലാണ് ഫുട്ബോൾ ലോകം ഒന്നടങ്കമുള്ളത്. അടുത്ത സീസണിൽ മെസ്സിയെ പിഎസ്ജി ജേഴ്സിയിൽ കാണാമെന്നാണ് ഇപ്പോൾ പുതുതായി പുറത്ത് വരുന്ന എല്ലാ റിപ്പോർട്ടുകളും ചൂണ്ടികാണിക്കുന്നത്. ഇപ്പോഴിതാ മെസ്സി പിഎസ്ജിയിലേക്ക് തന്നെ എത്തുമെന്നുള്ള മറ്റൊരു സ്ഥിരീകരണം കൂടി പുറത്ത് വന്നിട്ടുണ്ട്. പിഎസ്ജിയുടെ ഉടമയായ ഖത്തർ അമീറിന്റെ സഹോദരനാണ് ഇക്കാര്യം സ്ഥിരീകരിച്ചിട്ടുള്ളത്.തന്റെ ഒഫീഷ്യൽ ട്വിറ്റെർ അക്കൗണ്ടിലൂടെയാണ് അമീറിന്റെ സഹോദരനായ ഖാലിദ് ബിൻ ഹമാദ് ബിൻ ഖലീഫ അൽത്താനിയാണ് മെസ്സി പിഎസ്ജിയിലേക്ക് എത്തുമെന്ന് സ്ഥിരീകരിച്ചത്.

മെസ്സി പിഎസ്ജി ജേഴ്സിയിൽ നിൽക്കുന്ന ചിത്രം പങ്കുവെച്ച് കൊണ്ട് അദ്ദേഹം കുറിച്ചത് ഇങ്ങനെയാണ്. ” ചർച്ചകൾ ഔദ്യോഗികമായി ഇപ്പോൾ പൂർത്തിയായിട്ടുണ്ട്.പ്രഖ്യാപനം പിന്നീട് ഉണ്ടാവും ” ഇതാണ് അദ്ദേഹം ഫുട്ബോൾ ലോകത്തെ അറിയിച്ചത്.

അതേസമയം മറ്റൊരു ചിത്രം കൂടി അദ്ദേഹം പങ്കുവെച്ചിട്ടുണ്ട്. സെർജിയോ റാമോസും ലയണൽ മെസ്സിയുമുള്ള ചിത്രമാണ് ട്വീറ്റ് ചെയ്തത്.കൂടാതെ 8 ചാമ്പ്യൻസ് ലീഗ് എന്ന ക്യാപ്ഷനും നൽകിയിട്ടുണ്ട്. ഇരുവരും നേടിയ ചാമ്പ്യൻസ് ലീഗിന്റെ എണ്ണമാണ് അദ്ദേഹം ഇതുവഴി സൂചിപ്പിച്ചത്. ഏതായാലും ഇദ്ദേഹത്തിന്റെ ട്വീറ്റോടെ മെസ്സി പിഎസ്ജിയിലേക്ക് തന്നെയെന്ന് ഉറപ്പിച്ചിരിക്കുകയാണ് ഫുട്ബോൾ ലോകം.