ഹൃദയം തകർന്ന് നെയ്മർ, കണ്ണീരൊപ്പി മെസ്സി!

കോപ്പ അമേരിക്ക ഫൈനലിൽ ബ്രസീലിനെ എതിരില്ലാത്ത ഒരു ഗോളിന് പരാജയപ്പെടുത്തി കൊണ്ട് അർജന്റീന കിരീടത്തിൽ മുത്തമിട്ടിരുന്നു.ഇതോടെ അർജന്റീന ജേഴ്സിയിൽ കിരീടമില്ലെന്ന വിമർശനത്തിന് മെസ്സി അറുതി വരുത്തുകയും ചെയ്തു. എന്നാൽ മറുഭാഗത്ത് പരാജയമേറ്റ് ഹൃദയം തകർന്ന് തല കുനിച്ചു നിന്ന ഒരു താരമുണ്ടായിരുന്നു. ബ്രസീലിയൻ സൂപ്പർ താരമായ നെയ്മർ ജൂനിയറായിരുന്നു അത്‌. ഇതുവരെ കോപ്പ അമേരിക്ക കിരീടം നേടാൻ കഴിയാത്ത നെയ്മർക്ക്‌ ഇപ്പോഴും അത്‌ സ്വപ്നമായി അവശേഷിക്കുകയായിരുന്നു.

എന്നാൽ ഹൃദയം തകർന്ന് നിൽക്കുന്ന തന്റെ ഉറ്റസുഹൃത്തിനെ ആശ്വസിപ്പിക്കാൻ മെസ്സി മറന്നില്ല. ഏറെ നേരമാണ് മെസ്സി നെയ്മറെ കെട്ടിപിടിച്ചു കൊണ്ട് ആശ്വസിപ്പിച്ചത്.ഒരുപക്ഷെ പരാജയത്തിന്റെ വേദന ഒരുപാട് തവണ അനുഭവിച്ചിട്ടുണ്ട് മെസ്സി. അത്കൊണ്ട് തന്നെയായിരിക്കണം അദ്ദേഹം നെയ്മറെ സമാശ്വസിപ്പിക്കാൻ സമയം കണ്ടെത്തിയത്. ഈ കോപ്പയിൽ തങ്ങളുടെ ടീമിന് സർവ്വം മറന്ന് പോരാടിയവരാണ് ഇരുവരും. മെസ്സിക്ക് അതിനുള്ള ഫലം ലഭിച്ചപ്പോൾ നെയ്മർക്ക്‌ കണ്ണീർ തൂകാനായിരുന്നു വിധി.2020-ലെ ചാമ്പ്യൻസ് ലീഗ് ഫൈനലിൽ പരാജയമേറ്റ് തലകുനിച്ച നെയ്മർക്ക്‌ ഇത്തവണയും തല കുനിക്കാനായിരുന്നു വിധി. പക്ഷേ മെസ്സിയെ പോലെ അയാളും ഒരിക്കൽ കോപ്പ കിരീടത്തിൽ മുത്തമിടുമെന്നുള്ള പ്രതീക്ഷയിലാണ് ആരാധകരുള്ളത്.