സ്വപ്നം യാഥാർത്ഥ്യമായി : മെസ്സിയെ കുറിച്ച് യുണൈറ്റഡ് താരം!

വരുന്ന വേൾഡ് കപ്പ് യോഗ്യതാ മത്സരങ്ങൾക്കുള്ള അർജന്റൈൻ ടീമിൽ ഇടം നേടാൻ മാഞ്ചസ്റ്റർ യുണൈറ്റഡിന്റെ യുവസൂപ്പർ താരമായ അലെജാൻഡ്രോ ഗർനാച്ചോക്ക് സാധിച്ചിരുന്നു.കഴിഞ്ഞ ദിവസം അദ്ദേഹം അർജന്റൈൻ ടീമിനൊപ്പം പരിശീലനം നടത്താൻ ഈ പതിനേഴുകാരന് സാധിക്കുകയും ചെയ്തിരുന്നു. നിലവിൽ മാഞ്ചസ്റ്റർ യുണൈറ്റഡിന്റെ യൂത്ത് ടീമിനു വേണ്ടി കളിച്ചുകൊണ്ടിരിക്കുന്ന ഗർനാച്ചോ ഭാവി വാഗ്ദാനങ്ങളിൽ ഒരാളായാണ് വിലയിരുത്തപ്പെടുന്നത്.

ഏതായാലും കഴിഞ്ഞ ദിവസം അദ്ദേഹം തന്റെ സോഷ്യൽ മീഡിയയിൽ ഒരു ചിത്രം പങ്കു വെച്ചിട്ടുണ്ട്. സൂപ്പർ താരം ലയണൽ മെസ്സിക്കൊപ്പം നിൽക്കുന്ന ഒരു ചിത്രമാണ് ഗർനാച്ചോ പങ്കു വെച്ചിട്ടുള്ളത്. ” സ്വപ്നം ഇതാ യാഥാർഥ്യമായിരിക്കുന്നു, ആരാധനാ പുരുഷനായ ലയണൽ മെസ്സിയോടൊപ്പം ” എന്നാണ് ക്യാപ്ഷനായി കൊണ്ട് ഗർനാച്ചോ നൽകിയിട്ടുള്ളത്.അർജന്റൈൻ ക്യാമ്പിലെ യുവ താരങ്ങൾ എല്ലാവരും തന്നെ മെസ്സിയോടൊപ്പമുള്ള ഈ ചിത്രങ്ങൾ പങ്കു വെച്ചിട്ടുണ്ട്.

വെനിസ്വേല,ഇക്വഡോർ എന്നിവർക്കെതിരെയാണ് അർജന്റീന യോഗ്യതാ മത്സരങ്ങൾ കളിക്കുക.ഈ മത്സരങ്ങളിൽ ഏതെങ്കിലും ഒരു മത്സരത്തിൽ സ്‌കലോണി ഗർനാച്ചോക്ക് അർജന്റൈൻ ജേഴ്‌സിയിൽ അരങ്ങേറാനുള്ള അവസരം നൽകുമെന്നാണ് പ്രമുഖ മാധ്യമമായ ESPN റിപ്പോർട്ട് ചെയ്തിട്ടുള്ളത്.അതായത് താരത്തെ അർജന്റൈൻ ദേശീയ ടീമിനൊപ്പം ചേർത്തുപിടിക്കാനാണ് അധികൃതർ ശ്രമിക്കുന്നത്.

2004-ൽ സ്പെയിനിലെ മാഡ്രിഡിലാണ് ഗർനാച്ചോ ജനനം കൊണ്ടത്.താരത്തിന്റെ അമ്മ അർജന്റീനക്കാരിയാണ്. അതുകൊണ്ട് തന്നെ താരത്തിന് ഇരട്ടപൗരത്വമുണ്ട്.സ്പെയിനിന്റെ അണ്ടർ 18 ടീമിന് വേണ്ടി താരം കളിച്ചിട്ടുണ്ട്.എന്നാൽ സ്കലോണിയുടെ ക്ഷണം സ്വീകരിച്ച് ഗർനാച്ചോ അർജന്റൈൻ ദേശീയ ടീമിന്റെ ഭാഗമാവുകയായിരുന്നു.