ലൗറ്ററോയുടെ പിഴവുകൾ, പ്രതികരിച്ച് മെസ്സിയും സ്കലോനിയും!

ഇന്നലെ ഖത്തർ വേൾഡ് കപ്പിൽ നടന്ന പ്രീ ക്വാർട്ടർ പോരാട്ടത്തിൽ ഓസ്ട്രേലിയയെ ഒന്നിനെതിരെ രണ്ടു ഗോളുകൾക്ക് പരാജയപ്പെടുത്താൻ അർജന്റീനക്ക് സാധിച്ചിരുന്നു. ലയണൽ മെസ്സിയും ഹൂലിയൻ ആൽവരസുമാണ് അർജന്റീനയുടെ ഗോളുകൾ നേടിയിരുന്നത്. എന്നാൽ പകരക്കാരനായി ഇറങ്ങിയ ലൗറ്ററോ മാർട്ടിനെസ്സ് നിരവധി സുവർണ്ണാവസരങ്ങൾ തുലച്ചു കളഞ്ഞത് ആരാധകർക്ക് വളരെയധികം നിരാശ നൽകിയ ഒരു കാര്യമായിരുന്നു.

എന്നാൽ മത്സരശേഷം അർജന്റീനയുടെ നായകനായ ലയണൽ മെസ്സിയും പരിശീലകനായ ലയണൽ സ്കലോനിയും ലൗറ്ററോയെ പിന്തുണച്ചുകൊണ്ടാണ് സംസാരിച്ചിട്ടുള്ളത്.ലൗറ്ററോ തങ്ങൾക്ക് വളരെ പ്രധാനപ്പെട്ട താരമാണ് എന്നാണ് ഇരുവരും പറഞ്ഞിട്ടുള്ളത്.മെസ്സിയുടെ വാക്കുകൾ ഇങ്ങനെയാണ്.

” ഞങ്ങളെ സംബന്ധിച്ചിടത്തോളം ലൗറ്ററോ വളരെ പ്രധാനപ്പെട്ട താരമാണ്.ഗോൾ നേടാൻ വേണ്ടി ശ്രമിക്കുന്ന ഒരു സ്ട്രൈക്കറാണ് അദ്ദേഹം.തീർച്ചയായും അദ്ദേഹം നല്ല രൂപത്തിൽ നിലനിൽക്കുക എന്നുള്ളത് വരുന്ന മത്സരങ്ങളിൽ പ്രാധാന്യമർഹിക്കുന്നത് തന്നെയാണ് ” ഇതാണ് മെസ്സി പറഞ്ഞിട്ടുള്ളത്.

സ്കലോനി പറഞ്ഞത് ഇങ്ങനെയാണ്. ” മുമ്പ് ഒരുപാട് തവണ ഗോളുകൾ നേടി കൊണ്ട് ഞങ്ങളെ രക്ഷിച്ചിട്ടുള്ള താരമാണ് ലൗറ്ററോ. തീർച്ചയായും അദ്ദേഹം ഞങ്ങൾക്ക് ഇനിയും ഒരുപാട് സന്തോഷങ്ങൾ നൽകും. ഇപ്പോൾ അദ്ദേഹത്തെ മോശമായി വിലയിരുത്തുന്നത് തികച്ചും നീതിയല്ലാത്ത ഒരു കാര്യമാണ്. ലൗറ്ററോ മികച്ച രൂപത്തിൽ തന്നെ ഇനിയും തുടരും ” അർജന്റീന പരിശീലകൻ പറഞ്ഞു.

സമീപകാലത്ത് അർജന്റീനക്ക് വേണ്ടി ഏറ്റവും കൂടുതൽ ഗോളുകൾ നേടിയ താരങ്ങളിൽ ഒരാളാണ് ലൗറ്ററോ.പക്ഷേ ഈ വേൾഡ് കപ്പിൽ അദ്ദേഹത്തിന് തിളങ്ങാൻ കഴിഞ്ഞിട്ടില്ല. എന്നിരുന്നാൽ പോലും അദ്ദേഹം വളരെ പ്രധാനപ്പെട്ട താരമാണ് എന്ന് തന്നെയാണ് മെസ്സിയും സ്കലോനിയും പറഞ്ഞുവെക്കുന്നത്.