മെസ്സി ഇല്ലാതെ കളിക്കാൻ കഴിയുമെന്ന് ഞങ്ങൾ തെളിയിച്ചു,പക്ഷേ: വാൾട്ടർ സാമുവൽ പറയുന്നു!

ഇന്ന് കോപ്പ അമേരിക്കയിൽ നടന്ന ഗ്രൂപ്പ് ഘട്ടത്തിലെ അവസാന മത്സരത്തിൽ വിജയം നേടാൻ വമ്പൻമാരായ അർജന്റീനക്ക് സാധിച്ചിരുന്നു. എതിരില്ലാത്ത രണ്ട് ഗോളുകൾക്കാണ് അർജന്റീന പെറുവിനെ പരാജയപ്പെടുത്തിയത്. സൂപ്പർ താരം ലൗറ്ററോ മാർട്ടിനസാണ് മത്സരത്തിൽ തിളങ്ങിയിട്ടുള്ളത്.രണ്ട് ഗോളുകളും അദ്ദേഹമാണ് നേടിയത്.

മെസ്സി മത്സരത്തിൽ കളിച്ചിരിക്കുന്നില്ല. ഫിറ്റ്നസ് പ്രശ്നങ്ങൾ ഉള്ളതുകൊണ്ടുതന്നെ മെസ്സിക്ക് വിശ്രമം നൽകുകയായിരുന്നു. കൂടാതെ പരിശീലകൻ സ്‌കലോണിക്ക് വിലക്ക് ലഭിക്കുകയും ചെയ്തിരുന്നു. അതുകൊണ്ടുതന്നെ മത്സരശേഷം പ്രസ് കോൺഫറൻസിൽ വാൾട്ടർ സാമുവലായിരുന്നു ഉണ്ടായിരുന്നത്. മെസ്സി ഇല്ലാതെയും കളിക്കാൻ കഴിയുമെന്ന് തങ്ങൾ തെളിയിച്ചു എന്നും എന്നാൽ എപ്പോഴും മെസ്സി ഉണ്ടായിരിക്കാൻ ആഗ്രഹിക്കുന്നുവെന്നും സാമുവൽ പറഞ്ഞിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

” എപ്പോഴും മെസ്സി ഞങ്ങളോടൊപ്പം ഉണ്ടായിരിക്കാൻ ഞങ്ങൾ ആഗ്രഹിക്കുന്നു.മെസ്സി ഇല്ലെങ്കിലും കഴിയുമെന്ന് ഇന്ന് ഞങ്ങൾ തെളിയിച്ചു.പക്ഷേ എപ്പോഴും അദ്ദേഹം കളിക്കാനാണ് ഞങ്ങൾ ആഗ്രഹിക്കുന്നത്.ഇന്ന് മികച്ച പ്രകടനമാണ് താരങ്ങൾ നടത്തിയത്. മെസ്സി ഇല്ലാത്തതു കൊണ്ട് തന്നെ ഞങ്ങൾക്ക് ഞങ്ങളുടെ കളി ശൈലി ഇന്ന് മാറ്റേണ്ടി വന്നിരുന്നു ” ഇതാണ് അർജന്റീനയുടെ അസിസ്റ്റന്റ് പരിശീലകൻ പറഞ്ഞിട്ടുള്ളത്.

ഏതായാലും മൂന്നു മത്സരങ്ങളിൽ മൂന്നിലും വിജയിക്കാൻ കഴിഞ്ഞു എന്നത് അർജന്റീനക്ക് സന്തോഷം നൽകുന്ന കാര്യമാണ്. 4 ഗോളുകൾ നേടിയ ലൗറ്ററോ മാർട്ടിനസാണ് ഇപ്പോൾ ഗോൾഡൻ ബൂട്ട് പോരാട്ടത്തിൽ മുന്നിട്ടുനിൽക്കുന്നത്.