ഫൈനലിന് മുന്നേ രോഹിത്തിന് മെസ്സിയുടെ ജേഴ്സി സമ്മാനിച്ച് ബെക്കാം,ചിത്രങ്ങൾ വൈറൽ!

ഈ വർഷത്തെ ക്രിക്കറ്റ് വേൾഡ് കപ്പ് അതിന്റെ പരിസമാപ്തിയിൽ എത്തി നിൽക്കുകയാണ്. ഇന്ത്യയും ഓസ്ട്രേലിയയും തമ്മിലാണ് ഫൈനൽ മത്സരത്തിൽ ഏറ്റുമുട്ടുക. ഞായറാഴ്ച ഉച്ചയ്ക്ക് രണ്ടുമണിക്കാണ് ഈ കലാശ പോരാട്ടം ആരംഭിക്കുക. വേൾഡ് കപ്പിൽ ഉടനീളം തകർപ്പൻ പ്രകടനം നടത്തിയ ഇന്ത്യ ഓസിസിനെ പരാജയപ്പെടുത്തിക്കൊണ്ട് കിരീടം ചൂടുമെന്നാണ് ആരാധകർ പ്രതീക്ഷിക്കുന്നത്.

സെമിഫൈനൽ പോരാട്ടത്തിൽ ന്യൂസിലാൻഡിനെ പരാജയപ്പെടുത്തി കൊണ്ടായിരുന്നു ഇന്ത്യ ഫൈനൽ പ്രവേശനം നേടിയിരുന്നത്. ഈ മത്സരത്തിൽ മുഖ്യ അതിഥിയായി കൊണ്ട് ഇംഗ്ലീഷ് ഇതിഹാസമായ ഡേവിഡ് ബെക്കാം എത്തിയിരുന്നു. സൂപ്പർ താരം ലയണൽ മെസ്സിയുടെ അമേരിക്കൻ ക്ലബ്ബായ ഇന്റർ മയാമിയുടെ ഉടമസ്ഥൻ കൂടിയാണ്ഡേവിഡ് ബെക്കാം.യുണിസെഫിന്റെ അംബാസിഡർ എന്ന നിലയിലാണ് അദ്ദേഹം ഇന്ത്യയിൽ എത്തിയിരുന്നത്.

ഇന്ത്യൻ ക്യാപ്റ്റനായ രോഹിത് ശർമയുമായി ഇദ്ദേഹം കൂടിക്കാഴ്ച നടത്തിയിരുന്നു. ഇന്ത്യയിലെ ലാലിഗയുടെ അംബാസഡറായ രോഹിത്തിന് ഒരു റയൽ മാഡ്രിഡ് ജേഴ്സി ബെക്കാം സമ്മാനിച്ചിട്ടുണ്ട്.ബെക്കാമിന് ഇന്ത്യൻ ജേഴ്സിയും രോഹിത്ത് നൽകിയിട്ടുണ്ട്. മാത്രമല്ല ലയണൽ മെസ്സിയുടെ ഇന്റർ മയാമി ജേഴ്സി ബെക്കാം രോഹിത്തിന് സമ്മാനിച്ചിട്ടുണ്ട്.

ഇതിന്റെ ചിത്രങ്ങളാണ് ഇപ്പോൾ സോഷ്യൽ മീഡിയയിൽ വൈറൽ ആയിരിക്കുന്നത്. അതായത് രോഹിത്തിന്റെ മോൾ ഈ ജേഴ്‌സി അണിഞ്ഞു നിൽക്കുന്ന ചിത്രങ്ങൾ താരത്തിന്റെ ഭാര്യ ഇൻസ്റ്റഗ്രാമിൽ പങ്കുവെച്ചിട്ടുണ്ട്. ലയണൽ മെസ്സിയെ ഇഷ്ടപ്പെടുന്ന ഒരു കുഞ്ഞു ആരാധികയാണ് രോഹിത്തിന്റെ മകൾ. ആ ചിത്രത്തിന് ക്യാപ്ഷനായി കൊണ്ട് റിതിക കുറിച്ചിരിക്കുന്നത് ഇങ്ങനെയാണ്. ” ലയണൽ മെസ്സിയുടെ ഈ കുഞ്ഞു ആരാധികയെ വളരെയധികം ഹാപ്പിയാക്കിയതിൽ നിങ്ങൾക്ക് നന്ദി പറയുന്നു ഡേവിഡ് ബെക്കാം ” ഇതായിരുന്നു റിതിക എഴുതിയിരുന്നത്.

ഏതായാലും നിർണായകമായ ഒരു മത്സരത്തിന് തന്നെയാണ് രോഹിത്തും സംഘവും അഹമ്മദാബാദിൽ ഇറങ്ങുന്നത്. കഴിഞ്ഞ വർഷമായിരുന്നു അർജന്റീന ഖത്തർ വേൾഡ് കപ്പ് കിരീടം നേടിയിരുന്നത്. ഇന്ത്യക്ക് ക്രിക്കറ്റിൽ മറ്റൊരു വേൾഡ് കപ്പ് നേടാനുള്ള അവസരമാണ് ഇപ്പോൾ കൈവന്നിരിക്കുന്നത്.