ഞങ്ങടെ ക്യാപ്റ്റനെ കാക്കണേ..! കട്ടൗട്ട് ഒടിഞ്ഞ വിഷയത്തിൽ കേരളക്കാരോട് അർജന്റൈൻ മാധ്യമം.

ഖത്തർ വേൾഡ് കപ്പിന്റെ ആവേശം ലോകത്തിന്റെ മുക്കിലും മൂലയിലും പ്രചരിക്കുന്ന ഒരു സമയമാണ്.കേരളത്തിലെ ആവേശവും ലോക ശ്രദ്ധ നേടിയിരുന്നു.പുള്ളാവൂരിലെ സൂപ്പർ താരങ്ങളുടെ കട്ടൗട്ടുകൾ ഒട്ടുമിക്ക ഫുട്ബോൾ മാധ്യമങ്ങളും പങ്കുവെച്ചിരുന്നു. ഇതിനുപുറമേ ഫിഫ തന്നെ ഒഫീഷ്യലായി കൊണ്ട് അത് ട്വീറ്റ് ചെയ്തിരുന്നു.

അതേസമയം വഴിക്കടവ് മുണ്ടയിൽ സ്ഥാപിച്ച ലയണൽ മെസ്സിയുടെ ഒരു കൂറ്റൻ കട്ടൗട്ട് ഒടിഞ്ഞു തൂങ്ങുന്ന വീഡിയോ സാമൂഹിക മാധ്യമങ്ങളിൽ വൈറലായിരുന്നു.ഈ വീഡിയോ ഇപ്പോൾ അർജന്റൈൻ മാധ്യമമായ TYC സ്പോർട്സ് പങ്കുവെച്ചിട്ടുണ്ട്. ഞങ്ങളുടെ ക്യാപ്റ്റനെ കാക്കണേ എന്ന രൂപത്തിലുള്ള ഒരു ക്യാപ്ഷൻ ആണ് അവർ അതിന് നൽകിയിട്ടുള്ളത്.

‘ ഇന്ത്യയിലെ ജനങ്ങളുടെ ട്രിബൂട്ട് ശ്രമം ഞങ്ങൾ അംഗീകരിക്കുന്നു. എന്നാൽ ഞങ്ങളുടെ ക്യാപ്റ്റന്റെ കാര്യത്തിൽ ജാഗ്രത പുലർത്തണേ ‘ എന്നാണ് ഇവർ ക്യാപ്ഷൻ ആയി കൊണ്ട് നൽകിയിട്ടുള്ളത്. അതേസമയം ഇതിന്റെ കമന്റ് ബോക്സിൽ ആരാധകർ സത്യാവസ്ഥ ബോധ്യപ്പെടുത്തുകയും ചെയ്തിട്ടുണ്ട്.

അതായത് ഈ കട്ടൗട്ട് ശരിയായ രൂപത്തിൽ സ്ഥാപിച്ചു കഴിഞ്ഞ വിവരം ആരാധകർ കമന്റ് ബോക്സിലൂടെ അവരെ അറിയിച്ചിട്ടുണ്ട്. അതിന്റെ ചിത്രങ്ങളും വീഡിയോകളും ആരാധകർ പങ്കുവെച്ചിട്ടുമുണ്ട്. ഏതായാലും കേരളത്തിന്റെ ഫുട്ബോൾ ആവേശം ലോകമെമ്പാടും പ്രചരിച്ച് കഴിഞ്ഞതിന്റെ തെളിവുകളാണ് ഇവ.