ഓസ്ട്രേലിയക്കെതിരെ കാര്യങ്ങൾ എളുപ്പമാവുമോ? ലയണൽ മെസ്സി പറയുന്നു!

ഖത്തർ വേൾഡ് കപ്പിൽ നടന്ന തങ്ങളുടെ അവസാന ഗ്രൂപ്പുഘട്ട മത്സരത്തിൽ മിന്നുന്ന വിജയം നേടാൻ അർജന്റീനക്ക് സാധിച്ചിരുന്നു. എതിരില്ലാത്ത രണ്ടു ഗോളുകൾക്കാണ് അർജന്റീന പോളണ്ടിനെ പരാജയപ്പെടുത്തിയത്. മത്സരത്തിൽ മികച്ച പ്രകടനം അർജന്റീന പുറത്തെടുത്തിരുന്നു.മാക്ക് ആല്ലിസ്റ്റർ,ജൂലിയൻ ആൽവരസ് എന്നിവരാണ് അർജന്റീനക്ക് വേണ്ടി ഗോളുകൾ നേടിയത്.

ഏതായാലും വിജയത്തോടുകൂടി അർജന്റീന ഗ്രൂപ്പ് ചാമ്പ്യന്മാരായി കൊണ്ട് തന്നെ പ്രീ ക്വാർട്ടറിൽ പ്രവേശിച്ചിട്ടുണ്ട്. ഗ്രൂപ്പ് ഡിയിലെ രണ്ടാം സ്ഥാനക്കാരായ ഓസ്ട്രേലിയയാണ് പ്രീ ക്വാർട്ടറിൽ അർജന്റീനയുടെ എതിരാളികൾ. എന്നാൽ ആ മത്സരത്തിൽ കാര്യങ്ങൾ ഒട്ടും എളുപ്പമാവില്ല എന്നുള്ള ഒരു മുന്നറിയിപ്പ് ഇപ്പോൾ ലയണൽ മെസ്സി അർജന്റീനക്ക് നൽകിയിട്ടുണ്ട്.മത്സരശേഷം അദ്ദേഹം പറഞ്ഞ വാക്കുകൾ ഇങ്ങനെയാണ്.

” ഓസ്ട്രേലിയക്കെതിരെയുള്ള മത്സരം വളരെയധികം ബുദ്ധിമുട്ടുള്ള ഒരു മത്സരമാവാനാണ് പോകുന്നത്. കാരണം ആർക്കും ആരെയും തോൽപ്പിക്കാം എന്നുള്ള ഒരു സ്ഥിതിയാണ് ഇവിടെയുള്ളത്. എല്ലാം ഇവിടെ സാധ്യമാണ്. ഏറ്റവും മികച്ച രൂപത്തിൽ ഞങ്ങൾക്ക് മത്സരം കളിക്കേണ്ടതുണ്ട്. ആണ് ഞങ്ങൾ എപ്പോഴും ചെയ്യാറുള്ളത് ” ഇതാണ് അർജന്റീനയുടെ നായകനായ ലയണൽ മെസ്സി പറഞ്ഞിട്ടുള്ളത്.

എന്നിരുന്നാലും അർജന്റീനയെ സംബന്ധിച്ചിടത്തോളം ഗ്രൂപ്പ് ചാമ്പ്യന്മാരായതുകൊണ്ട് കാര്യങ്ങൾ എളുപ്പമാകുകയാണ് ചെയ്തിട്ടുള്ളത്. രണ്ടാം സ്ഥാനത്തായിരുന്നു ഫിനിഷ് ചെയ്തിരുന്നുവെങ്കിൽ അർജന്റീനയുടെ എതിരാളികളായി കൊണ്ട് ഫ്രാൻസ് വരുമായിരുന്നു. അത് കാര്യങ്ങളെ കൂടുതൽ സങ്കീർണ്ണമാക്കുകയാണ് ചെയ്യുക.