അദ്ദേഹത്തിന്റെ വീട് നിറയെ മെസ്സിയുടെ ചിത്രങ്ങളാണ് :ഗർനാച്ചോയെ കുറിച്ച് യൂത്ത്‌ കോർഡിനേറ്റർ!

അർജന്റീനയുടെയും സ്പെയിനിന്റെയും പൗരത്വമുള്ള വ്യക്തിയാണ് മാഞ്ചസ്റ്റർ യുണൈറ്റഡിന്റെ യുവസൂപ്പർ താരം അലജാൻഡ്രോ ഗർനാച്ചോ. സ്പെയിനിന്റെ അണ്ടർ 18 ടീമിന് വേണ്ടി അദ്ദേഹം കളിക്കുകയും ചെയ്തിട്ടുണ്ട്. പക്ഷേ അർജന്റീനയുടെ സീനിയർ ടീമിനുവേണ്ടി അദ്ദേഹം കളിക്കാൻ തീരുമാനിക്കുകയായിരുന്നു. സ്പാനിഷ് ദേശീയ ടീമിൽ നിന്ന് ക്ഷണമുണ്ടായിട്ടും അദ്ദേഹം അത് നിരസിച്ചുകൊണ്ട് അർജന്റീന ദേശീയ ടീമിൽ തുടരാൻ തീരുമാനിക്കുകയായിരുന്നു.

ക്രിസ്റ്റ്യാനോ റൊണാൾഡോയെ വളരെയധികം ഇഷ്ടപ്പെടുന്ന വ്യക്തിയാണ് ഗർനാച്ചോ. മാത്രമല്ല അർജന്റീനയുടെ നായകനായ ലയണൽ മെസ്സിയെയും ഗർനാച്ചോ ഇഷ്ടപ്പെടുന്നുണ്ട്. ഇക്കാര്യം അർജന്റീനയുടെ യൂത്ത് കോർഡിനേറ്ററായ ബെർണാഡോ റോമിയോ ഇപ്പോൾ തുറന്നു പറഞ്ഞിട്ടുണ്ട്.ഗർനാച്ചോയുടെ വീട് നിറയെ ലയണൽ മെസ്സിയുടെ ചിത്രങ്ങളാണ് എന്നാണ് റോമിയോ പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട് ചെയ്യുന്നത് ഇങ്ങനെയാണ്.

” അർജന്റീനയുടെ ദേശീയ ടീമിൽ കളിക്കുക എന്നുള്ളത് ഗർനാച്ചോ വളരെയധികം കൺവിൻസഡ് ആയതിനുശേഷം എടുത്ത തീരുമാനമാണ്.നിങ്ങൾ അദ്ദേഹത്തിന്റെ വീട്ടിലേക്ക് പോയാൽ അവിടെ നിറയെ ലയണൽ മെസ്സിയുടെ ചിത്രം കാണാൻ കഴിയും. സ്പെയിൻ ദേശീയ ടീമിന്റെ പരിശീലകൻ ഗർനാച്ചോയെ വിളിച്ചിരുന്നു.വളരെ ബഹുമാനത്തോടെ കൂടി തന്നെയാണ് അദ്ദേഹം സംസാരിച്ചിട്ടുള്ളത്. പക്ഷേ അർജന്റീന ദേശീയ ടീമിന് വേണ്ടി കളിക്കാനുള്ള തീരുമാനം ഗർനാച്ചോ തന്നെയാണ് കൈകൊണ്ടിട്ടുള്ളത് ” അർജന്റീന യൂത്ത് കോർഡിനേറ്റർ പറഞ്ഞു.

ഈ മാസം നടക്കുന്ന സൗഹൃദ മത്സരങ്ങൾക്കുള്ള അർജന്റീനയുടെ ദേശീയ ടീമിൽ ഇടം നേടാൻ ഗർനാച്ചോക്ക് സാധിച്ചിരുന്നു. പക്ഷേ പരിക്കു മൂലം അദ്ദേഹത്തിന് ഈ മത്സരങ്ങൾ കളിക്കാനാവില്ല എന്നുള്ളത് സ്ഥിരീകരിക്കപ്പെട്ടിരുന്നു. അദ്ദേഹത്തിന്റെ അർജന്റീന ദേശീയ ടീമിന് വേണ്ടിയുള്ള അരങ്ങേറ്റത്തിന് ഇനിയും കാത്തിരിക്കേണ്ടിവരും.