ഫൈനലിൽ MNM ഗോളടിക്കും, ചാമ്പ്യൻസ് ലീഗ് പിഎസ്ജി സ്വന്തമാക്കും : നെയ്മർ!

ഈ സീസണിലെ ചാമ്പ്യൻസ് ലീഗിൽ ഏറ്റവും കൂടുതൽ കിരീടസാധ്യത കല്പിക്കപ്പെടുന്ന ടീമുകളിൽ ഒന്നാണ് ഫ്രഞ്ച് ശക്തികളായ പിഎസ്ജി. ഈ സീസണിൽ മെസ്സി, റാമോസ്, ഡോണ്ണാരുമ എന്നീ താരങ്ങളെ പിഎസ്ജി സ്വന്തമാക്കിയിരുന്നു. കൂടാതെ മെസ്സി, നെയ്മർ, എംബപ്പേ എന്ന ശക്തമായ മുന്നേറ്റ നിരയും പിഎസ്ജിക്കുണ്ട്.

ഏതായാലും ഈയിടെ സൂപ്പർ താരമായ നെയ്മർ ജൂനിയർ പ്രമുഖ ഫുട്ബോൾ മാധ്യമമായ ഓ മൈ ഗോളിന് ഒരു ഇന്റർവ്യൂ നൽകിയിരുന്നു. ഈ വരുന്ന ചാമ്പ്യൻസ് ലീഗ് ഫൈനലിൽ MNM കൂട്ടുകെട്ടിൽ ആരായിരിക്കും ഗോൾ നേടുക എന്നുള്ളതായിരുന്നു ഒരു ചോദ്യം. എന്നാൽ തങ്ങൾ മൂന്ന് പേരും ഓരോ ഗോൾ വീതം നേടുമെന്നും അത് വഴി പിഎസ്ജി വിജയിക്കുമെന്നുമാണ് നെയ്മർ അറിയിച്ചത്. നെയ്മറുടെ വാക്കുകൾ ഇങ്ങനെയാണ്.

” ഞങ്ങൾ മൂന്ന് പേരും ഗോൾ നേടും.ഓരോ ഗോൾ വീതമാണ് ഞങ്ങൾ നേടുക. അങ്ങനെ 3-1 എന്ന സ്കോറിന് ഞങ്ങൾ ഫൈനലിൽ വിജയിക്കും ” ഇതായിരുന്നു നെയ്മറുടെ മറുപടി.

ഏതായാലും മികച്ച രൂപത്തിൽ തന്നെയാണ് പിഎസ്ജി ഇപ്പോൾ കളിച്ചു കൊണ്ടിരിക്കുന്നത്. ഇനി ചാമ്പ്യൻസ് ലീഗിൽ മാഞ്ചസ്റ്റർ സിറ്റിക്കെതിരെയാണ് പിഎസ്ജിയുടെ അടുത്ത മത്സരം.ആദ്യമത്സരത്തിൽ സിറ്റിയെ പരാജയപ്പെടുത്താൻ പിഎസ്ജിക്ക് സാധിച്ചിരുന്നു.