പിഎസ്ജി ആരാധകർക്ക് നെയ്മറുടെ ഉറപ്പ്,UCL നേടാൻ വേണ്ടി എല്ലാം നൽകും!

യുവേഫ ചാമ്പ്യൻസ് ലീഗിൽ നടന്ന ആദ്യപാദ പ്രീ ക്വാർട്ടർ പോരാട്ടത്തിൽ പിഎസ്ജി സ്വന്തം മൈതാനത്ത് പരാജയപ്പെട്ടിരുന്നു. ഏകപക്ഷീയമായ ഒരു ഗോളിനായിരുന്നു പിഎസ്ജിയെ ബയേൺ പരാജയപ്പെടുത്തിയത്.ഇനി മാർച്ച് എട്ടാം തീയതിയാണ് രണ്ടാം പാദ മത്സരം അരങ്ങേറുക. ആ മത്സരത്തിൽ ഒരു മികച്ച വിജയം നേടിയാൽ മാത്രമേ പിഎസ്ജിക്ക് ചാമ്പ്യൻസ് ലീഗിൽ മുന്നോട്ട് പോവാൻ സാധിക്കുകയുള്ളൂ.

ഇപ്പോഴിതാ ബ്രസീലിയൻ സൂപ്പർതാരമായ നെയ്മർ ജൂനിയർ ആരാധകർക്ക് ചാമ്പ്യൻസ് ലീഗിന്റെ കാര്യത്തിൽ ഒരു ഉറപ്പു നൽകിയിട്ടുണ്ട്.അതായത് കിരീടം നേടാൻ വേണ്ടി സാധ്യമായതെല്ലാം തങ്ങൾ ചെയ്യും എന്നുള്ള ഉറപ്പാണ് ഇപ്പോൾ നെയ്മർ ജൂനിയർ നൽകിയിട്ടുള്ളത്.പിഎസ്ജിക്ക് ചാമ്പ്യൻസ് ലീഗ് കിരീടം നേടാനാവുമോ എന്ന ചോദ്യത്തിന് മറുപടി പറയുകയായിരുന്നു നെയ്മർ ജൂനിയർ.

“തീർച്ചയായും ഞങ്ങൾ എല്ലാവരും ചാമ്പ്യൻസ് ലീഗ് കിരീടം നേടാൻ ആഗ്രഹിക്കുന്നു.ചാമ്പ്യൻസ് ലീഗ് കിരീടം നേടും എന്ന ഉറപ്പ് എനിക്ക് നൽകാനാവില്ല. കാരണം അത് വളരെ ലളിതമാണ് എന്നൊരു തോന്നൽ അപ്പോൾ ഉണ്ടാവും. എന്നാൽ അങ്ങനെയല്ല.ലോകത്തിലെ ഏറ്റവും മികച്ച ക്ലബ്ബുകളും ഏറ്റവും മികച്ച താരങ്ങളും ആണ് ചാമ്പ്യൻസ് ലീഗിൽ ഏറ്റുമുട്ടുന്നത്.അതൊരിക്കലും എളുപ്പമായ ഒന്നല്ല. പക്ഷേ അത് നേടാൻ വേണ്ടി ഞങ്ങൾ സർവ്വതും നൽകും എന്നുള്ള കാര്യം ഞാൻ ഉറപ്പു നൽകുന്നു. കമ്മിറ്റ്മെന്റിന്റെ കാര്യത്തിൽ യാതൊരുവിധ അഭാവവും ഇവിടെ ഉണ്ടാവില്ല ” നെയ്മർ ജൂനിയർ പറഞ്ഞതായി RMC സ്പോർട് റിപ്പോർട്ട് ചെയ്തു.

കഴിഞ്ഞ ലില്ലിക്കെതിരെയുള്ള മത്സരത്തിൽ നെയ്മർക്ക് പരിക്കേറ്റിരുന്നു.അടുത്ത ചാമ്പ്യൻസ് ലീഗ് മത്സരത്തിൽ അദ്ദേഹം കളിക്കുമോ എന്നുള്ള കാര്യം സംശയത്തിലാണ്. ആ മത്സരത്തിൽ തിരിച്ചെത്താൻ നെയ്മർ പരമാവധി ശ്രമിക്കുന്നു എന്നാണ് റിപ്പോർട്ടുകൾ.