ഉടൻ തന്നെ കാണാം സുഹൃത്തേ, മെസ്സിക്ക് നെയ്മറുടെ ഹൃദയത്തിൽ നിന്നുള്ള സന്ദേശം !

ചാമ്പ്യൻസ് ലീഗിൽ മാഞ്ചസ്റ്റർ യുണൈറ്റഡിനെതിരെയുള്ള മത്സരത്തിന് ശേഷം പിഎസ്ജി സൂപ്പർ താരം നെയ്മർ ജൂനിയർ നടത്തിയ ഒരു പ്രസ്താവന വളരെ വലിയ തോതിൽ ഫുട്ബോൾ ലോകം ചർച്ച ചെയ്തിരുന്നു. തനിക്ക് മെസ്സിക്കൊപ്പം ഒരിക്കൽ കൂടി കളിക്കാൻ ആഗ്രഹമുണ്ടെന്നും അടുത്ത വർഷം അതിന് സാധ്യമാവുമെന്നാണ് താൻ പ്രതീക്ഷിക്കുന്നത് എന്നുമായിരുന്നു ബ്രസീലിയൻ താരത്തിന്റെ പ്രസ്താവന. ഇതോടെ മെസ്സി പിഎസ്ജിയിലേക്ക് എന്ന വാർത്തകൾ വലിയ രൂപത്തിൽ പ്രചരിച്ചിരുന്നു. ഏതായാലും ഒരു നിയോഗമെന്നോണം ഇരുവരും കളത്തിൽ ഒരുമിക്കാനിരിക്കുകയാണ്. പക്ഷെ എതിരാളികളുടെ രൂപത്തിലാണെന്ന് മാത്രം. ഇന്നലെ നടന്ന ചാമ്പ്യൻസ് ലീഗ് പ്രീ ക്വാർട്ടർ തിരഞ്ഞെടുപ്പിൽ പിഎസ്ജിക്ക്‌ എതിരാളികളായി ലഭിച്ചത് ബാഴ്‌സയെയാണ്. ഗ്രൂപ്പിൽ രണ്ടാം സ്ഥാനക്കാരായി ഫിനിഷ് ചെയ്തതിനാലാണ് ബാഴ്സക്ക്‌ പിഎസ്ജിയെ ലഭിച്ചത്.

ഏതായാലും ഇത് തീരുമാനിക്കപ്പെട്ടയുടൻ തന്റെ സുഹൃത്തായ മെസ്സിക്ക് സന്ദേശമയച്ചിരിക്കുകയാണ് നെയ്മർ ജൂനിയർ. ” ഉടൻ തന്നെ കാണാം സുഹൃത്തേ ” എന്നാണ് നെയ്മർ തന്റെ സാമൂഹികമാധ്യമങ്ങളിൽ കുറിച്ചിട്ടുള്ളത്. ഇരുവരും ഒരുമിച്ച് നിൽക്കുന്ന ഒരു ഫോട്ടോയും പങ്കുവെക്കാൻ നെയ്മർ മറന്നില്ല. ഫെബ്രുവരി 17, മാർച്ച്‌ 11 എന്നീ തിയ്യതികളിലാണ് പിഎസ്ജി ബാഴ്‌സയെ നേരിടുന്നത്. മുമ്പ് ക്യാമ്പ് നൗവിൽ വെച്ച് പിഎസ്ജിയെ 6-1 ന് തകർത്ത ശേഷം ഇതാദ്യമായാണ് ബാഴ്‌സ പിഎസ്ജിയെ നേരിടുന്നത്. അന്ന് ബാഴ്സയുടെ വിജയത്തിന് പ്രധാനകാരണക്കാരനായ നെയ്മർ ഇനി പിഎസ്ജിക്ക്‌ വേണ്ടിയാണ് ബൂട്ടണിയുക. ഏതായാലും മെസ്സി-ക്രിസ്റ്റ്യാനോ പോരാട്ടം ചാമ്പ്യൻസ് ലീഗിൽ കാണാൻ ലഭിച്ചതിന് പിന്നാലെ മെസ്സി-നെയ്മർ പോരാട്ടം കാണാൻ ലഭിക്കുന്നതിന്റെ ആവേശത്തിലാണ് ആരാധകർ.