സുവർണ്ണ യുഗം അവസാനിപ്പിച്ച് പെപ് ഗ്വാർഡിയോള മാഞ്ചസ്റ്റർ സിറ്റി വിടുന്നു; കാരണം വെളിപ്പെടുത്തി കോച്ച്!

മാഞ്ചസ്റ്റർ സിറ്റിയുടെ ചരിത്രത്തിലെ ഏറ്റവും വിജയകരമായ ഒരു അധ്യായത്തിനാണ് ഈ വരാനിരിക്കുന്ന ഞായറാഴ്ച ഇത്തിഹാദ് സ്റ്റേഡിയത്തിൽ തിരശ്ശീല വീഴുന്നത്. ആസ്റ്റൺ വില്ലയ്‌ക്കെതിരെയുള്ള മത്സരത്തോടെ താൻ ക്ലബ്ബിന്റെ മാനേജർ സ്ഥാനം ഒഴിയുകയാണെന്ന് പെപ് ഗ്വാർഡിയോള വാർത്താസമ്മേളനത്തിൽ സ്ഥിരീകരിച്ചു. 2016-ൽ ക്ലബ്ബിൽ എത്തിയ പെപ്, നീണ്ട 10 വർഷത്തെ സേവനത്തിന് ശേഷമാണ് സിറ്റിയോട് വിടപറയുന്നത്.

​ ​താൻ പെട്ടെന്നൊരു ദിവസം എടുത്ത തീരുമാനമല്ല ഇതെന്നും, കുറച്ചുകാലമായി മനസ്സിൽ രൂപപ്പെട്ടുവന്ന ഒരു പ്രക്രിയയുടെ ഭാഗമാണിതെന്നും പെപ് വ്യക്തമാക്കി. വാർത്താസമ്മേളനത്തിലും സോഷ്യൽ മീഡിയയിലും വന്ന അദ്ദേഹത്തിന്റെ പ്രധാന പ്രതികരണങ്ങൾ ഇങ്ങനെയാണ്: "10 വർഷം എന്നത് വളരെ വലിയൊരു സമയമാണ്. ക്ലബ്ബിന് ഇനി പുതിയൊരു മാനേജരെയും പുതിയൊരു ഊർജ്ജത്തെയുമാണ് ആവശ്യം എന്ന് ഞാൻ കരുതുന്നു. നിലവിലുള്ള ഈ മികച്ച കളിക്കാർക്ക് ഇനി മറ്റൊരു പുതിയ അധ്യായം എഴുതിച്ചേർക്കാൻ ഇതിലൂടെ സാധിക്കും. എന്റെ തീരുമാനത്തെ ക്ലബ്ബ് പൂർണ്ണമായി ബഹുമാനിക്കുന്നു. കോച്ചിന് ശേഷമുള്ള ഒരു കാലത്തിനായി ക്ലബ്ബ് തീർച്ചയായും സജ്ജമാകേണ്ടതുണ്ട്, ഇത് അതിനുള്ള കൃത്യമായ സമയമാണെന്ന് എനിക്ക് തോന്നി. എന്റെ ആത്മാവിൽ വലിയൊരു സമാധാനത്തോടെയാണ് ഞാൻ മാഞ്ചസ്റ്റർ സിറ്റി വിടുന്നത്. ഈ ക്ലബ്ബിനായി എനിക്ക് നൽകാൻ കഴിയുന്നതെല്ലാം ഞാൻ നൽകിയിട്ടുണ്ട്. അതിലുപരി ക്ലബ്ബിനെ മികച്ചൊരു നിലയിൽ എത്തിക്കാനും ഈ പത്ത് വർഷത്തിനിടയിൽ ഞങ്ങൾ ചെയ്ത കാര്യങ്ങൾ ആളുകൾ ആസ്വദിച്ചു എന്ന് ഉറപ്പുവരുത്താനും എനിക്ക് സാധിച്ചു. ഇനി എനിക്ക് എന്റെ ജീവിതം ജീവിക്കണം, അടുത്തതായി എന്താണ് സംഭവിക്കുക എന്ന് നോക്കണം."

​​മൂന്ന് വർഷത്തെ കരാറിൽ സിറ്റിയിലെത്തിയ പെപ് ഗ്വാർഡിയോള 10 വർഷം പൂർത്തിയാക്കുമ്പോൾ 20 പ്രധാന കിരീടങ്ങളാണ് ക്ലബ്ബിന് നേടിക്കൊടുത്തത്. ഇതിൽ 6 പ്രീമിയർ ലീഗ് കിരീടങ്ങളും, 2023-ൽ നേടിയ ചരിത്രപ്രസിദ്ധമായ ചാമ്പ്യൻസ് ലീഗ് ട്രെബിളും ഉൾപ്പെടുന്നു. ഇംഗ്ലീഷ് ഫുട്ബോളിന്റെ ശൈലി തന്നെ മാറ്റിയെഴുതിയ പെപ്, പ്രീമിയർ ലീഗ് ചരിത്രത്തിൽ ഏറ്റവും കൂടുതൽ പോയിന്റ് ആവറേജുള്ള (2.34) പരിശീലകൻ എന്ന റെക്കോർഡോടെയാണ് പടിയിറങ്ങുന്നത്.

​മാനേജർ സ്ഥാനം ഒഴിയുമെങ്കിലും സിറ്റി ഫുട്ബോൾ ഗ്രൂപ്പിന്റെ (CFG) ഗ്ലോബൽ അംബാസഡർ എന്ന പുതിയ ചുമതലയിലേക്ക് പെപ് മാറും. ഞായറാഴ്ച ആസ്റ്റൺ വില്ലയ്‌ക്കെതിരെ നടക്കുന്ന മത്സരം പെപിന്റെ സിറ്റി കരിയറിലെ 593-ാമത്തെയും അവസാനത്തെയും മത്സരമായിരിക്കും. ക്ലബ്ബിനോടുള്ള ആദരസൂചകമായി ഇത്തിഹാദ് സ്റ്റേഡിയത്തിലെ പുതുതായി വികസിപ്പിച്ച നോർത്ത് സ്റ്റാൻഡിന് ‘ദി പെപ് ഗ്വാർഡിയോള സ്റ്റാൻഡ്’ എന്ന് പേരിടുമെന്ന് ക്ലബ്ബ് ഇതിനകം പ്രഖ്യാപിച്ചിട്ടുണ്ട്.