“മെസ്സിയുടെ അർജന്റീനയ്ക്കെതിരെ ഫൈനലിൽ ബൈസിക്കിൾ കിക്ക് ഗോൾ; ലോകകപ്പ് സ്വപ്നം പങ്കുവെച്ച് സ്പാനിഷ് താരം ഗവി”
2026 ഫിഫ ലോകകപ്പിന്റെ ആവേശം കൊടുമുടിയിലെത്തി നിൽക്കെ, ഫൈനൽ മത്സരത്തെക്കുറിച്ചുള്ള തന്റെ വലിയൊരു സ്വപ്നം പങ്കുവെച്ചിരിക്കുകയാണ് സ്പെയിന്റെ യുവ മിഡ്ഫീൽഡർ ഗവി. ലോകകപ്പ് ഫൈനലിൽ ലയണൽ മെസ്സിയുടെ അർജന്റീനയ്ക്കെതിരെ കളിച്ച്, ഒരു മനോഹരമായ 'ബൈസിക്കിൾ കിക്ക്' (Chilena) ഗോളിലൂടെ കിരീടം നേടണമെന്നാണ് ബാഴ്സലോണ താരത്തിന്റെ ആഗ്രഹം. ക്വാർട്ടർ ഫൈനലിൽ ബെൽജിയത്തിനെതിരെയുള്ള നിർണായക പോരാട്ടത്തിന് മുന്നോടിയായി നടത്തിയ പത്രസമ്മേളനത്തിലാണ് താരം മനസ്സ് തുറന്നത്. ബാഴ്സലോണയുടെ ലാ മാസിയ അക്കാദമിയിലൂടെ വളർന്നുവന്ന ഗാവിക്ക് ചെറുപ്പം മുതലേ ലയണൽ മെസ്സിയോട് വലിയ ആരാധനയുണ്ട്. 2009-ൽ പെപ് ഗ്വാർഡിയോളയുടെ കീഴിൽ മെസ്സി ചാമ്പ്യൻസ് ലീഗ് കിരീടം ഉയർത്തുമ്പോൾ ഗാവിക്ക് വെറും അഞ്ച് വയസ്സ് മാത്രമായിരുന്നു പ്രായം.ഗാവി ബാഴ്സലോണയുടെ സീനിയർ ടീമിലേക്ക് ഉയർന്നുവന്ന അതേ സമയത്താണ് മെസ്സി ക്ലബ് വിട്ട് പി.എസ്.ജിയിലേക്ക് ചേക്കേറുന്നത്. അതുകൊണ്ടുതന്നെ തന്റെ വലിയൊരു ആരാധനാപാത്രമായ മെസ്സിക്കൊപ്പം ഒരു മത്സരത്തിൽ കളിക്കാനോ, അദ്ദേഹത്തിനെതിരെ മൈതാനത്ത് ഇറങ്ങാനോ ഗാവിക്ക് ഇതുവരെ അവസരം ലഭിച്ചിട്ടില്ല."ലോകകപ്പ് ഫൈനലിൽ ഒരു ബൈസിക്കിൾ കിക്ക് ഗോൾ നേടണമെന്ന് ഞാൻ സ്വപ്നം കാണുന്നു. മെസ്സി ഉള്ളതുകൊണ്ട് തന്നെ എതിരാളികൾ അർജന്റീന ആയിരിക്കണമെന്നാണ് ആഗ്രഹം.
എങ്കിലും ഞങ്ങൾ ഫൈനലിൽ എത്തിയാൽ എതിരാളികൾ ആരായാലും കുഴപ്പമില്ല. ഇതൊക്കെ വലിയ സ്വപ്നങ്ങളാണ്, അവ യാഥാർത്ഥ്യമാകുമെന്ന് പ്രതീക്ഷിക്കുന്നു." എന്നാണ് ഗവി പറഞ്ഞത്. നിലവിലെ ലോകകപ്പ് ഫിക്സ്ചർ അനുസരിച്ച് സ്പെയിനും അർജന്റീനയും രണ്ട് വ്യത്യസ്ത ഗ്രൂപ്പുകളിലാണ് മുന്നേറുന്നത്. അതുകൊണ്ടുതന്നെ ഇരുവരും തങ്ങളുടെ മത്സരങ്ങൾ വിജയിച്ചാൽ ഫൈനലിൽ നേർക്കുനേർ വരാനുള്ള സാധ്യതകൾ ഏറെയാണ്. ആരാധകരും ഈയൊരു സ്വപ്ന ഫൈനലിനായുള്ള കാത്തിരിപ്പിലാണ്.
