അർജന്റൈൻ താരങ്ങളെ വില്ലയിലേക്ക് കൊണ്ടുവരുമെന്ന് എമി,മെസ്സിയെ വേണമെന്ന് ആരാധകർ!

നിലവിൽ തകർപ്പൻ പ്രകടനമാണ് ഇംഗ്ലീഷ് പ്രീമിയർ ലീഗ് ക്ലബ്ബായ ആസ്റ്റൻ വില്ല പുറത്തെടുക്കുന്നത്.അവസാനമായി കളിച്ച 10 മത്സരങ്ങളിൽ ഒന്നിൽ പോലും അവർ പരാജയപ്പെട്ടിട്ടില്ല. പ്രീമിയർ ലീഗിൽ അഞ്ചാം സ്ഥാനത്തേക്ക് കയറാൻ ഇപ്പോൾ വില്ലക്ക് സാധിച്ചിട്ടുണ്ട്. അവരുടെ പരിശീലകനായ ഉനൈ എംരി തന്നെയാണ് ടീമിനെ ഉയർത്തെഴുന്നേൽപ്പിച്ചിട്ടുള്ളത്. മാത്രമല്ല ഗോൾ കീപ്പറായ എമിലിയാനോ മാർട്ടിനസും ഇപ്പോൾ തകർപ്പൻ പ്രകടനം നടത്തുന്നുണ്ട്.

ഏതായാലും ആസ്റ്റൻ വില്ലയെ കുറിച്ച് എമി ഇപ്പോൾ മനസ്സ് തുറന്ന് സംസാരിച്ചിട്ടുണ്ട്. ക്ലബ്ബിൽ താൻ വളരെയധികം ഹാപ്പിയാണെന്നും കുറച്ച് അർജന്റൈൻ സഹതാരങ്ങളെ ക്ലബ്ബിലേക്ക് കൊണ്ടുവരണമെന്നുമാണ് എമി പറഞ്ഞിട്ടുള്ളത്.ഇയാൻ റൈറ്റുമായി നടത്തിയ അഭിമുഖത്തിൽ സംസാരിക്കുകയായിരുന്നു ഇദ്ദേഹം.എമിയുടെ വാക്കുകൾ ഇങ്ങനെയാണ്.

“ആസ്റ്റൻ വില്ല ഒരു വലിയ ക്ലബ് ആണ്.ഈ ക്ലബ്ബിന് വേണ്ടി കളിക്കുന്നതിൽ ഞാൻ വളരെയധികം ഹാപ്പിയാണ്. മാത്രമല്ല എനിക്ക് വളരെയധികം അഭിമാനവും ഉണ്ട്.ഇവിടെ തുടരുന്നതിനെ ഞാൻ വളരെയധികം ഇഷ്ടപ്പെടുന്നു. മാത്രമല്ല അർജന്റീനയിലെ തന്റെ സുഹൃത്തുക്കളെ ഇവിടേക്ക് കൊണ്ടുവരാൻ ഞാൻ ശ്രമിക്കുന്നുണ്ട്. എനിക്കത് സ്വന്തം വീട് പോലെയാണ് അനുഭവപ്പെടുന്നത് ” ഇതാണ് എമിലിയാനോ മാർട്ടിനസ് പറഞ്ഞിട്ടുള്ളത്.

അതേസമയം ഇതിന്റെ കമന്റ് ബോക്സിൽ ആരാധകരുടെ ആവശ്യം വളരെ ശക്തമാണ്. ലയണൽ മെസ്സിയെ ക്ലബ്ബിലേക്ക് കൊണ്ടുവരൂ എന്നാണ് ആസ്റ്റൻ വില്ല ആരാധകർ ആവശ്യപ്പെട്ടിട്ടുള്ളത്.എമിയുടെ സഹതാരവും സുഹൃത്തുമാണ് ലയണൽ മെസ്സി. ഈ വരുന്ന ട്രാൻസ്ഫർ ജാലകത്തിൽ പിഎസ്ജി വിടാനുള്ള ഒരുക്കത്തിലാണ് മെസ്സിയുള്ളത്.