ഹാവെർട്സ് ചെൽസിയിലേക്ക് തന്നെ, സ്ഥിരീകരണവുമായി സാനെ !

ബയേർ ലെവർകൂസന്റെ ജർമ്മൻ യുവതാരം കായ് ഹാവെർട്സിന്റെ വാർത്തകളാണ് ഇപ്പോൾ ട്രാൻസ്ഫർ വിപണിയിൽ സജീവമായി നിലകൊള്ളുന്ന ഒന്ന്. താരം ചെൽസിയിലേക്കാണ് എന്ന ശക്തമായ അഭ്യൂഹങ്ങൾ പ്രചരിക്കുമ്പോഴും ഇത് വരെ വ്യക്തമായ ഒരു കരാറിൽ എത്താൻ ചെൽസിക്ക് കഴിഞ്ഞിട്ടില്ല. ചെൽസിയുടെ നിബന്ധനകൾ എല്ലാം തന്നെ ഹാവെർട്സ് അംഗീകരിച്ചിട്ടുണ്ട്. അതിന് ശേഷം ക്ലബ് വിടാൻ ഹാവെർട്സ് അനുമതി തേടിയിട്ടുമുണ്ട്. എന്നാൽ ബയേർ ഇതിൽ ഒരു തീരുമാനം കൈക്കൊണ്ടിട്ടില്ല. ഇപ്പോഴിതാ താരം ചെൽസിയിലേക്ക് തന്നെയാണ് കൂടുമാറുക എന്ന് ഉറപ്പ് നൽകിയിരിക്കുകയാണ് ജർമനിയിലെ സഹതാരമായ ലിറോയ് സാനെ. കഴിഞ്ഞ ദിവസം തന്നെ ബയേൺ താരമായി അവതരിപ്പിക്കുന്ന വേളയിലാണ് സാനെ ചെൽസിയെ കുറിച്ചും ഹാവെർട്സിനെ കുറിച്ചും പരാമർശിച്ചത്. ഹാവെർട്സ് സാനെയും മുൻ ക്ലബായ മാഞ്ചസ്റ്റർ സിറ്റിയിലേക്കും കൂടുമാറുമെന്ന അഭ്യൂഹങ്ങൾ തുടക്കത്തിൽ ഉണ്ടായിരുന്നുവെങ്കിലും ചെൽസി സിറ്റിയെ മറികടക്കുകയായിരുന്നു.

” ഈ സമ്മറിൽ രണ്ട് മികച്ച ജർമ്മൻ താരങ്ങളായ ടിമോ വെർണറിനെയും കായ് ഹാവെർട്സിനേയും ചെൽസി സൈൻ ചെയ്തത് നല്ല കാര്യമാണ് ” എന്നാണ് സാനെ പറഞ്ഞത്. നിലവിൽ ഔദ്യോഗികമായി ഹാവെർട്സിനെ ചെൽസി സൈൻ ചെയ്തിട്ടില്ലെങ്കിലും താരം ബ്ലൂസിലേക്ക് ആണ് എന്ന് ഉറപ്പ് നൽകുകയായിരുന്നു സാനെ ചെയ്തത്. 70-80 യുറോയുടെ ഇടയിലാണ് താരത്തിന് വില പ്രതീക്ഷിക്കപ്പെടുന്നത്. ഈ സീസണിൽ പതിനേഴ് ഗോളുകളും ഒൻപത് അസിസ്റ്റുകളും താരം സ്വന്തം പേരിൽ എഴുതിച്ചേർത്തിട്ടുണ്ട്. താരത്തെ സൈൻ ചെയ്താൽ ചെൽസിയുടെ മൂന്നാമത്തെ സൈനിംഗ് ആവും ഇത്. സിയെച്ച്, വെർണർ എന്നിവരെ ചെൽസി എത്തിച്ചു കഴിഞ്ഞു. മികച്ച ഒരു ഗോൾകീപ്പറെ കൂടി ടീമിൽ എത്തിക്കാനുള്ള കഠിനശ്രമത്തിലാണ് ചെൽസി.