ഹാലണ്ട് നിങ്ങൾക്ക് പണിതരും,നിങ്ങളുടെ ജീവിതം ദുസ്സഹമാക്കും: പ്രീമിയർ ലീഗിലെ ഡിഫൻഡർമാർക്ക് മുന്നറിയിപ്പുമായി വാൻ ഡൈക്ക്!

കഴിഞ്ഞ കമ്മ്യൂണിറ്റി ഷീൽഡ് ഫൈനൽ മത്സരത്തിൽ മാഞ്ചസ്റ്റർ സിറ്റിയെ പരാജയപ്പെടുത്താൻ ലിവർപൂളിന് സാധിച്ചിരുന്നു.ഒന്നിനെതിരെ മൂന്നു ഗോളുകളുടെ വിജയം നേടിയ ലിവർപൂൾ കിരീടം ചൂടുകയായിരുന്നു. മത്സരത്തിൽ സൂപ്പർതാരം എർലിംഗ് ഹാലണ്ട് സിറ്റിക്ക് വേണ്ടി ഇറങ്ങിയിരുന്നുവെങ്കിലും കാര്യമായി ഒന്നും ചെയ്യാൻ കഴിഞ്ഞിരുന്നില്ല. മാത്രമല്ല ഒരു സുവർണ്ണാവസരം താരം പാഴാക്കുകയും ചെയ്തിരുന്നു.

അതുകൊണ്ടുതന്നെ ചെറിയ വിമർശനങ്ങൾ ഹാലണ്ടിന് ഏൽക്കേണ്ടി വന്നിരുന്നു.എന്നാൽ ലിവർപൂളിന്റെ ഡിഫന്ററായ വാൻ ഡൈക്കിന് മറ്റൊരു അഭിപ്രായമാണുള്ളത്.ഹാലണ്ട് ഡിഫന്റർമാരെ ബുദ്ധിമുട്ടിലാക്കുമെന്നും ഇംഗ്ലണ്ടിലെ ഡിഫന്റർമാരുടെ ജീവിതം ദുസ്സഹമാക്കുമെന്നുമാണ് വാൻ ഡൈക്ക് പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട് ചെയ്യുന്നത് ഇങ്ങനെയാണ്.

” മത്സരത്തിൽ ഞങ്ങൾ എല്ലാ സ്ട്രൈക്കർമാരിലും ഒരുപോലെ ശ്രദ്ധ നൽകിയിരുന്നു. തീർച്ചയായും ഡിഫന്റർമാരുടെ ജീവിതം ബുദ്ധിമുട്ടിലാക്കാൻ കഴിയുന്ന ഒരുപാട് ക്വാളിറ്റികൾ ഉള്ള താരമാണ് ഹാലണ്ട്.ഇംഗ്ലണ്ടിലെ ഡിഫന്റർമാരുടെ ജീവിതം ഹാലണ്ട് ദുസ്സഹമാക്കും.അദ്ദേഹത്തിന് എല്ലാ ക്വാളിറ്റികളുമുണ്ട്. പെട്ടെന്ന് ബോളിനെ മനസ്സിലാക്കാൻ അദ്ദേഹത്തിന് കഴിയും,കൂടാതെ വേഗതയുമുണ്ട്. പക്ഷേ ഈ മത്സരത്തിൽ ഞങ്ങൾക്ക് അദ്ദേഹത്തെ പിടിച്ചു കെട്ടാൻ സാധിച്ചു.അദ്ദേഹത്തിന് അവസരങ്ങൾ ലഭിച്ചിരുന്നു.എന്നിരുന്നാലും ഞങ്ങൾ നല്ല രൂപത്തിലാണ് കാര്യങ്ങളെ കൈകാര്യം ചെയ്തത്” ഇതാണ് വാൻ ഡൈക്ക് പറഞ്ഞിട്ടുള്ളത്.

മാഞ്ചസ്റ്റർ സിറ്റിയുടെ അടുത്ത മത്സരം ഇനി പ്രീമിയർ ലീഗിൽ വെസ്റ്റ്ഹാമിനെതിരെയാണ്.അന്ന് ഹാലണ്ടിന്റെ പ്രകടനം എങ്ങനെയാകുമെന്നാണ് ആരാധകർ ഉറ്റുനോക്കുന്നത്.