വിനീഷ്യസിനെ ഒഴിവാക്കാൻ റയൽ, വാഗ്ദാനം ചെയ്തത് പ്രീമിയർ ലീഗ് ക്ലബ്ബിന്!

ഈ ട്രാൻസ്ഫറിൽ പ്രീമിയർ ലീഗ് വമ്പൻമാരായ മാഞ്ചസ്റ്റർ യുണൈറ്റഡ് ടീമിലെത്തിക്കാൻ ശ്രമിക്കുന്ന പ്രധാനപ്പെട്ട താരമാണ് റയലിന്റെ റാഫേൽ വരാനെ. പ്രതിരോധനിരതാരമായ വരാനെക്ക്‌ വേണ്ടി റയലും യുണൈറ്റഡും തമ്മിൽ നടത്തുന്ന ചർച്ച പുരോഗമിച്ചു കൊണ്ടിരിക്കുകയാണ്. അതേസമയം മറ്റൊരു റയൽ താരത്തിൽ കൂടി മാഞ്ചസ്റ്റർ യുണൈറ്റഡ് താല്പര്യം പ്രകടിപ്പിച്ചു കഴിഞ്ഞിട്ടുണ്ട്. ബ്രസീലിയൻ മുന്നേറ്റനിരതാരമായ വിനീഷ്യസിലാണ് യുണൈറ്റഡ് താല്പര്യം അറിയിച്ചത്. താരത്തെ ഒരു വർഷത്തെ ലോണിൽ എത്തിക്കാനായിരുന്നു യുണൈറ്റഡിന്റെ ഉദ്ദേശം. എന്നാൽ റയൽ മാഡ്രിഡ്‌ താരത്തെ പൂർണ്ണമായും വാഗ്ദാനം ചെയ്തതായാണ് റിപ്പോർട്ടുകൾ സൂചിപ്പിക്കുന്നത്. ഇംഗ്ലീഷ് മാധ്യമമായ മിററാണ് ഇക്കാര്യം റിപ്പോർട്ട്‌ ചെയ്തിട്ടുള്ളത്.അതായത് വിനീഷ്യസിനെ വിറ്റൊഴിവാക്കാൻ തന്നെയാണ് റയലിന്റെ തീരുമാനം.

പക്ഷേ താരത്തിന് വേണ്ടി റയൽ ആവിശ്യപ്പെടുന്ന തുകയാണ് യുണൈറ്റഡിന് തടസ്സമായി നിൽക്കുന്നത്.70 മില്യൺ യൂറോയാണ് റയൽ ആവിശ്യപ്പെടുന്നത്. ഇത്‌ നൽകാൻ യുണൈറ്റഡ് തയ്യാറായേക്കില്ല. എന്തെന്നാൽ ജേഡൻ സാഞ്ചോക്ക്‌ വേണ്ടി നല്ലൊരു തുക യുണൈറ്റഡ് ചിലവഴിച്ചു കഴിഞ്ഞിട്ടുണ്ട്. അതേസമയം എംബപ്പേക്ക്‌ വേണ്ടി പണം കണ്ടെത്തുക എന്ന ഉദ്ദേശത്തോടെയാണ് റയൽ വിനീഷ്യസിനെ വിൽക്കാൻ ആലോചിക്കുന്നത്. പക്ഷേ ക്ലബ്ബിന്റെ ഈ തീരുമാനത്തിൽ ബ്രസീലിയൻ താരം ഒട്ടും തൃപ്തനല്ല. റയലിൽ തന്നെ തുടരാനാണ് താരത്തിന്റെ ആഗ്രഹം. മുമ്പ് പിഎസ്ജിയുമായി ബന്ധപ്പെടുത്തി കൊണ്ട് റൂമറുകൾ ഉണ്ടായിരുന്ന സമയത്തും വിനീഷ്യസ് റയലിൽ തുടരാനുള്ള ആഗ്രഹം തുറന്ന് പറഞ്ഞിരുന്നു. റയലിൽ തന്റേതായ ഒരു അടയാളം സ്ഥാപിക്കണമെന്നായിരുന്നു വിനീഷ്യസ് അറിയിച്ചത്. റയലിന്റെ പുതിയ പരിശീലകനായ കാർലോ ആഞ്ചലോട്ടിക്കും വിനീഷ്യസ് നിലനിർത്തണമെന്നാണ് ആഗ്രഹമെന്നും റിപ്പോർട്ടുകൾ ചൂണ്ടികാണിക്കുന്നുണ്ട്.