റയലിലേക്ക് പോവാൻ കൊതിച്ച് സാഡിയോ മാനെ

ലിവർപൂളിന്റെ സെനഗലീസ് സൂപ്പർ താരം സാഡിയോ മാനേക്ക് റയലിലേക്ക് ചേക്കേറണം. പ്രമുഖഫുട്ബോൾ മാധ്യമമായ ഫ്രാൻസ് ഫുട്ബോൾ ആണ് ഇക്കാര്യം റിപ്പോർട്ട്‌ ചെയ്തിരിക്കുന്നത്. ലിവർപൂൾ വിട്ട് റയലിൽ കളിക്കാൻ താരം ആഗ്രഹിക്കുന്നുവെന്നും എന്നാൽ ഒരുപാട് പ്രതിബന്ധങ്ങൾ താരത്തിന് തരണം ചെയ്യേണ്ടതുണ്ടെന്നും റിപ്പോർട്ട്‌ പ്രതിപാദിക്കുന്നു. ലിവർപൂൾ പരിശീലകൻ യർഗൻ ക്ലോപിനും താരത്തിനുമിടക്ക് ചെറിയ രീതിയിൽ അസ്വാരസ്വങ്ങൾ ഉടലെടുത്തതായും ഇതിനാലാണ് താരം ക്ലബ്‌ വിടാൻ ആഗ്രഹിക്കുന്നതെന്നും റിപ്പോർട്ട്‌ ചൂണ്ടിക്കാണിക്കുന്നു.

നിലവിൽ 2023 വരെയാണ് താരത്തിന് ലിവർപൂളിൽ കരാർ അവശേഷിക്കുന്നത്. എന്നാൽ റയലിൽ കളിക്കാനാണ് താരം ആഗ്രഹിക്കുന്നത്. എന്നാൽ 150 മില്യൺ യുറോ എങ്കിലും താരത്തിന് ലഭിക്കണമെന്നാണ് ലിവർപൂൾ ആഗ്രഹിക്കുന്നത്. എന്നാൽ ഇത് നടന്നേക്കില്ല എന്നും റിപ്പോർട്ട്‌ പറയുന്നുണ്ട്. കോവിഡ് പ്രതിസന്ധിയിൽ സാമ്പത്തികമാന്ദ്യം നേരിടുന്ന റയൽ ഇത്രയും വലിയ തുകയൊന്നും ഈ ഇരുപത്തിയെട്ടുകാരനായ താരത്തിന് വേണ്ടി ചിലവഴിച്ചേക്കില്ല. മാത്രമല്ല സൂപ്പർ താരങ്ങളായ നെയ്മറെയും എംബപ്പേയെയും റയൽ നോട്ടമിട്ട് വെച്ചിട്ടുണ്ട്. എംബാപ്പയെ വലിയ തുക കൊടുത്തിട്ടാണേലും ടീമിൽ എത്തിക്കാൻ റയലിന് പ്ലാനുകൾ ഉണ്ട്. അത്കൊണ്ട് തന്നെ മാനേക്ക് റയൽ എന്നത് നിലവിലെ സാഹചര്യത്തിൽ ഒരു വിദൂരസ്വപ്നം മാത്രമാണ്.