പ്രീമിയർ ലീഗ് കിരീടം നേടാൻ സാധ്യതയുള്ള ക്ലബാണ് ചെൽസി, തുറന്നു പറഞ്ഞ് ക്ലോപ് !

ഇന്നലെ പ്രീമിയർ ലീഗിൽ നടന്ന മത്സരത്തിൽ ഒന്നിനെതിരെ മൂന്ന് ഗോളുകൾക്കായിരുന്നു ചെൽസി ലീഡ്‌സ് യുണൈറ്റഡിനെ കീഴടക്കിയത്.ഒരു ഗോളിന് പിറകിൽ നിന്ന ശേഷം മൂന്ന് ഗോളുകൾ തിരിച്ചടിച്ചാണ് ലീഡ്‌സിനെതിരെ ചെൽസി വിജയം കരസ്ഥമാക്കിയത്. ടീം ഒന്നടങ്കം മികച്ച പ്രകടനം കാഴ്ച്ചവെച്ചത് ലംപാർഡിനെ സംതൃപ്തനാക്കിയിരുന്നു. ജയത്തോടെ ചെൽസി പോയിന്റ് ടേബിളിൽ ഒന്നാം സ്ഥാനത്തേക്ക് കയറുകയും ചെയ്തിരുന്നു. പതിനൊന്ന് മത്സരങ്ങളിൽ നിന്ന് ഇരുപത്തിരണ്ട് പോയിന്റ് നേടിക്കൊണ്ടാണ് ചെൽസി ഒന്നാം സ്ഥാനത്തേക്ക് കയറിയത്. ഇതിനെ സംബന്ധിച്ച് ഒരു പ്രസ്താവന നടത്തി രംഗപ്രവേശനം ചെയ്തിരിക്കുകയാണ് ലിവർപൂൾ പരിശീലകൻ യുർഗൻ ക്ലോപ്. ഈ പ്രീമിയർ ലീഗ് കിരീടം നേടാൻ സാധ്യതയുള്ള ടീമുകളിൽ ഒന്നാണ് ചെൽസി എന്നാണ് ഇദ്ദേഹം പറഞ്ഞത്. ക്ലോപിന്റെ ക്ലബായ ലിവർപൂൾ പോയിന്റ് ടേബിളിൽ മൂന്നാം സ്ഥാനത്തുണ്ട്.

” ഞാൻ കണ്ട മത്സരങ്ങളിൽ എല്ലാം തന്നെ മികച്ച പ്രകടനമായിരുന്നു ടോട്ടൻഹാം കാഴ്ച്ചവെച്ചിരുന്നത്. എന്നാൽ ഈയൊരു നിമിഷത്തിൽ പ്രീമിയർ ലീഗ് കിരീടം നേടാൻ ഏറ്റവും സാധ്യതയുള്ള ടീമായി എനിക്ക് തോന്നുന്നത് ചെൽസിയെയാണ്. അവർക്ക് വലിയൊരു സ്‌ക്വാഡ് ഉണ്ട്. മികച്ച താരങ്ങളുണ്ട്. നല്ല രീതിയിൽ കളിക്കുന്നുമുണ്ട്. ഓരോ മത്സരം കൂടുംതോറും അത്ഭുതകരമായ മാറ്റങ്ങളാണ് അവരുടെ ടീമിൽ സംഭവിച്ചു കൊണ്ടിരിക്കുന്നത്. ഞങ്ങളിൽ അവർ സമ്മർദ്ദം തന്നെയാണ് ചെലുത്തുന്നത്. പക്ഷെ ഞാൻ മുമ്പ് പറഞ്ഞ പോലെ തന്നെ, കേവലം ഒരൊറ്റ ലക്ഷ്യം വെച്ച് മാത്രമല്ല ഞങ്ങൾ ഈ സീസണിന് ഇറങ്ങിയിരിക്കുന്നത്. ഞങ്ങൾക്ക്‌ സാധ്യമായ രീതിയിൽ ഏറ്റവും മികച്ച ഫുട്ബോൾ കളിക്കുക എന്നതും ഞങ്ങളുടെ ലക്ഷ്യമാണ്. അതിന് വേണ്ടിയാണ് ഞങ്ങൾ ശ്രമിച്ചു കൊണ്ടിരിക്കുന്നതും ” ക്ലോപ് അറിയിച്ചു.