എൻസോയെ പരിഹസിച്ച ബ്രസീലിയൻ മാധ്യമത്തിന് ചുട്ട മറുപടിയുമായി തിയാഗോ സിൽവ!

യുവേഫ ചാമ്പ്യൻസ് ലീഗിൽ നടന്ന ആദ്യപാദ പ്രീ ക്വാർട്ടർ പോരാട്ടത്തിൽ പ്രീമിയർ ലീഗ് വമ്പൻമാരായ ചെൽസിക്ക് പരാജയപ്പെടേണ്ടി വന്നിരുന്നു. ഏകപക്ഷീയമായ ഒരു ഗോളിനായിരുന്നു ബൊറൂസിയ ഡോർട്മുണ്ട് ചെൽസിയെ പരാജയപ്പെടുത്തിയിരുന്നത്. യുവ സൂപ്പർതാരം കരിം അഡയേമിയായിരുന്നു ബൊറൂസിയയുടെ വിജയ ഗോൾ നേടിയിരുന്നത്.

ചെൽസിയുടെ അർജന്റീന സൂപ്പർതാരമായ എൻസോ ഫെർണാണ്ടസിനെ ഓടി തോൽപ്പിച്ചു കൊണ്ടായിരുന്നു അഡയേമി ഗോൾ നേടിയിരുന്നത്.ലാസ്‌റ്റ് മാനായിരുന്ന എൻസോ ഫെർണാണ്ടസിന് കാര്യമായി ഒന്നും ചെയ്യാൻ സാധിക്കാതെ പോവുകയായിരുന്നു.ഇതിനെ പരിഹസിച്ചുകൊണ്ട് ബ്രസീലിയൻ മാധ്യമമായ Tnt സ്പോർട്സ് ബ്രസീൽ രംഗത്ത് വന്നിരുന്നു. അവരുടെ ഇൻസ്റ്റഗ്രാമിലൂടെയാണ് ഈ അർജന്റൈൻ താരത്തെ പരിഹസിച്ചത്.

എൻസോ ഫെർണാണ്ടസിന്റെ ചിത്രം പോസ്റ്റ് ചെയ്തു കൊണ്ട് അതിന്റെ ക്യാപ്ഷൻ ആയി കൊണ്ട് അവർ കുറിച്ചിരിക്കുന്നത് ഇങ്ങനെയാണ്. ” ഊബർ വിളിക്കൂ,എൻസോ ഫെർണാണ്ടസ് അഡയേമിക്ക് വേണ്ടി നോക്കിക്കൊണ്ടിരിക്കുകയാണ് ” ഇതായിരുന്നു അവർ കുറിച്ചിരുന്നത്. എന്നാൽ ഇതിനെതിരെ ചെൽസിയുടെ ബ്രസീലിയൻ സൂപ്പർതാരമായ തിയാഗോ സിൽവ പരസ്യമായി രംഗത്ത് വന്നിട്ടുണ്ട്.സിൽവയുടെ മറുപടി ഇങ്ങനെയാണ്.

” ഒട്ടും ബഹുമാനമില്ലാതെയാണ് നിങ്ങൾ പെരുമാറുന്നത്.നിങ്ങളുടെ ജോലിയുടെ കാര്യത്തിൽ കുറച്ചെങ്കിലും ഗൗരവം കാണിക്കൂ ” ഇതായിരുന്നു തിയാഗോ സിൽവയുടെ മറുപടി.

ഈ കഴിഞ്ഞ ട്രാൻസ്ഫർ വിൻഡോയിലായിരുന്നു എൻസോ ഫെർണാണ്ടസ് റെക്കോർഡ് തുകക്ക് ചെൽസിയിൽ എത്തിയത്. ഇതുവരെ മികച്ച പ്രകടനം പുറത്തെടുക്കാൻ അദ്ദേഹത്തിന് സാധിച്ചിട്ടുമുണ്ട്.