എംബാപ്പെയെ ആൻഫീൽഡിലെത്തിക്കാൻ ശ്രമം നടത്തി ക്ലോപ്
പിഎസ്ജിയുടെ ഫ്രഞ്ച് സൂപ്പർ താരം കെയ്‌ലിൻ എംബാപ്പെയെ ആൻഫീൽഡിലെത്തിക്കാൻ ലിവർപൂൾ പരിശീലകൻ യുർഗൻ ക്ലോപ് ശ്രമിക്കുന്നതായി റിപ്പോർട്ടുകൾ. ഫ്രഞ്ച് മാധ്യമമായ ലെടെൻ സ്പോർട്ട് ആണ് ഇക്കാര്യം റിപ്പോർട്ട്‌ ചെയ്തിരിക്കുന്നത്. എംബാപ്പെയെ ലിവർപൂളിൽ എത്തിക്കാൻ ക്ലോപ് താരത്തിന്റെ പിതാവിനെ ഫോണിൽ വിളിച്ചതായാണ് റിപ്പോർട്ടുകൾ പ്രതിപാദിക്കുന്നത്. താരത്തെ ലിവർപൂളിൽ താല്പര്യം ജനിപ്പിക്കാൻ ക്ലോപ് പിതാവിനോട് ആവശ്യപ്പെട്ടതായും റിപ്പോർട്ട്‌ പറയുന്നുണ്ട്. എന്നാൽ ആധികാരികമായ കൂടുതൽ വിവരങ്ങൾ ഒന്നും തന്നെ ഇതിൽ പറയുന്നില്ല. അടുത്ത സീസണിൽ താരത്തെ ടീമിൽ എത്തിക്കാൻ ക്ലോപ് ശ്രമം തുടങ്ങിയെങ്കിലും അതത്ര ലളിതമായ കാര്യമല്ല. 250 മില്യൺ പൗണ്ട് ആണ് പിഎസ്ജി താരത്തിന് വിലയിട്ടിരിക്കുന്നത്.
എന്നാൽ ഈ വാർത്തകളെയെല്ലാം നിഷേധിച്ചു കൊണ്ട് മുൻ പിഎസ്ജി, മൊണോക്കോ, ഫ്രഞ്ച് താരമായ ജെറോം റോതെൻ രംഗത്ത് വന്നു. എംബാപ്പെ മറ്റൊരു ക്ലബിൽ ചേരുന്നുവെങ്കിൽ അത് റയലിലേക്കായിരിക്കുമെന്ന് അദ്ദേഹം തറപ്പിച്ചു പറഞ്ഞു. ” എനിക്കറിയാം റയൽ മാഡ്രിഡും എംബാപ്പെയും തമ്മിലുള്ള കരാർ ഏകദേശം നടന്നു കഴിഞ്ഞെന്ന്. എന്തൊക്കെ സംഭവിച്ചാലും എംബാപ്പെ റയലിൽ എത്തുമെന്ന കാര്യം എനിക്കുറപ്പാണ്. പിഎസ്ജി താരത്തിന്റെ കരാർ പുതുക്കാനുള്ള യാതൊരു വഴിയും ഞാൻ കാണുന്നില്ല. താരത്തെ റയലിലേക്ക് വിടുന്നത് തന്നെയാണ് പിഎസ്ജിക്കും ഗുണം ” അദ്ദേഹം പറഞ്ഞു.
