സിറ്റിയെ ഒരു കാരണവശാലും എഴുതി തള്ളില്ല: വ്യക്തമാക്കി ആർടെറ്റ

പ്രീമിയർ ലീഗ് വമ്പൻമാരായ മാഞ്ചസ്റ്റർ സിറ്റിക്ക് ഇത് വളരെയധികം മോശം സമയമാണ്. അവസാനമായി കളിച്ച ആറു മത്സരങ്ങളിൽ അഞ്ചിലും അവർ പരാജയപ്പെടുകയായിരുന്നു. ഏറ്റവും ഒടുവിൽ ഫെയെനൂർദിനോട് അവർ സമനില വഴങ്ങുകയും ചെയ്തു. നിലവിൽ പ്രീമിയർ ലീഗ് പോയിന്റ് പട്ടികയിൽ മൂന്നാം സ്ഥാനത്താണ് മാഞ്ചസ്റ്റർ സിറ്റി ഉള്ളത്. ഒന്നാം സ്ഥാനക്കാരായ ലിവർപൂളുമായി 8 പോയിന്റിന്റെ വ്യത്യാസം അവശേഷിക്കുന്നുണ്ട്.

നിലവിൽ ആഴ്സണൽ അഞ്ചാം സ്ഥാനത്താണ് ഉള്ളത്. മാഞ്ചസ്റ്റർ സിറ്റിയുമായി ഒരു പോയിന്റിന്റെ വ്യത്യാസം മാത്രമാണ് ഉള്ളത്. എന്നാൽ മാഞ്ചസ്റ്റർ സിറ്റിയെ ഒരു കാരണവശാലും എഴുതിത്തള്ളാൻ ആഴ്സണലിന്റെ പരിശീലകനായ ആർടെറ്റ ഒരുക്കമല്ല. ഇത്തരം മോശം സമയം എല്ലാവർക്കും ഉണ്ടാകുമെന്നും കഴിഞ്ഞ 9 വർഷമായി അവർ പുലർത്തിയ സ്ഥിരത മറക്കാൻ പാടില്ല എന്നുമാണ് ഈ പരിശീലകൻ വ്യക്തമാക്കിയിട്ടുള്ളത്.ആർടെറ്റയുടെ വാക്കുകൾ ഇങ്ങനെയാണ്.

“കഴിഞ്ഞ 9 വർഷമായി അവർ ചെയ്ത കാര്യങ്ങൾ മറക്കാൻ പാടില്ല.9 വർഷത്തോളം സ്ഥിരത പുലർത്തുക എന്നത് വളരെ ബുദ്ധിമുട്ടുള്ള ഒരു കാര്യമാണ്. തീർച്ചയായും ഇത്തരം ബുദ്ധിമുട്ടേറിയ സമയം എല്ലാവർക്കും ഉണ്ടാകും.അവരെ സംബന്ധിച്ചിടത്തോളം ഇത് വളരെ വിചിത്രമാണ്. കാരണം 9 വർഷത്തോളം അവർക്ക് ഇത് അനുഭവിക്കേണ്ടി വന്നിട്ടില്ല. ഞങ്ങൾക്ക് പെർഫെക്ട് ആയിക്കൊണ്ട് മുന്നോട്ട് പോകേണ്ടതുണ്ട്. മാഞ്ചസ്റ്റർ സിറ്റിയെ ഒരിക്കലും എഴുതി തള്ളാൻ കഴിയില്ല.പെപ്പിന്റെ കാര്യത്തിൽ എനിക്ക് സഹതാപമുണ്ട്. ഇത്തരം അവസ്ഥ അഭിമുഖീകരിക്കുന്ന ലോകത്തെ എല്ലാ മാനേജർമാരുടെ കാര്യത്തിലും എനിക്ക് സഹതാപമുണ്ട്. കാരണം ഈ ജോലിയുടെ ബുദ്ധിമുട്ട് എനിക്കറിയാം ” ഇതാണ് ആഴ്സണൽ പരിശീലകൻ പറഞ്ഞിട്ടുള്ളത്.

മാഞ്ചസ്റ്റർ സിറ്റിയെ വളരെ കഠിനമായ ഒരു മത്സരമാണ് കാത്തിരിക്കുന്നത്.നാളെ നടക്കുന്ന മത്സരത്തിൽ ലിവർപൂൾ ആണ് അവരുടെ എതിരാളികൾ. നാളെ രാത്രി ഇന്ത്യൻ സമയം 9:30ന് ആൻഫീൽഡിൽ വെച്ചു കൊണ്ടാണ് ഈ മത്സരം നടക്കുക. ഈ മത്സരത്തിൽ കൂടി പരാജയപ്പെട്ടാൽ അവർ 11 പോയിന്റിന് പിറകിലാവും.