ലയണൽ മെസ്സിക്കൊപ്പം ഇന്റർ മയാമിയിൽ കളിക്കാൻ ആഗ്രഹിക്കുന്നു: തുറന്നു പറഞ്ഞ് മെസ്സിയുടെ മുൻ സഹതാരം.

ലയണൽ മെസ്സി ഇന്റർ മയാമിയിലേക്ക് വന്നതിന് പിന്നാലെയാണ് മെസ്സിയുടെ സുഹൃത്തുക്കളായ ബുസ്ക്കെറ്റ്സും ജോർഡി ആൽബയും ഇന്റർ മയാമിയിലേക്ക് വന്നത്. ലയണൽ മെസ്സിക്കൊപ്പം ഇരുവരും ദീർഘകാലം ബാഴ്സയിൽ വെച്ചുകൊണ്ട് കളിച്ചിട്ടുണ്ട്. ഈ മൂന്നു താരങ്ങളും ചേർന്നുകൊണ്ട് ഇപ്പോൾ ഇന്റർ മയാമിയെ ഉയരങ്ങളിലേക്ക് നയിക്കുകയാണ്. പ്രത്യേകിച്ച് മെസ്സി തകർപ്പൻ പ്രകടനമാണ് പുറത്തെടുക്കുന്നത്.

2018 മുതൽ 2020 വരെ ബാഴ്സലോണയിൽ മെസ്സിക്കൊപ്പം കളിച്ചിട്ടുള്ള താരമാണ് ആർതുറോ വിദാൽ. മെസ്സിയുടെ സഹതാരം എന്നതിനേക്കാളുപരി മെസ്സിയുടെ ഒരു അടുത്ത സുഹൃത്ത് കൂടിയാണ് വിദാൽ.ഇപ്പോഴിതാ മെസ്സിയോടൊപ്പം കളിക്കാനുള്ള ആഗ്രഹം അദ്ദേഹം തുറന്നു പറഞ്ഞിട്ടുണ്ട്.വിദാലിന്റെ വാക്കുകൾ ഇങ്ങനെയാണ്.

” ലയണൽ മെസ്സിക്കൊപ്പം കളിക്കുന്നതിനെ ഞാൻ ഇഷ്ടപ്പെടുന്നു.മെസ്സിക്കൊപ്പം കളിക്കുക എന്നുള്ളത് വളരെ എളുപ്പമുള്ള ഒരു കാര്യമാണ്. കാരണം നിങ്ങൾ അദ്ദേഹത്തിന് പാസ് നൽകിയാൽ മാത്രം മതിയാകും. മെസ്സിക്കൊപ്പം ബുസ്ക്കെറ്റ്സിനൊപ്പവും ഒരിക്കൽ കൂടി ഒരുമിച്ച് കളിക്കാൻ ഞാൻ ആഗ്രഹിക്കുന്നുണ്ട്. ഇന്റർ മയാമി ഇപ്പോൾ അവരുടെ എല്ലാ സ്‌ട്രെങ്‌തും പുറത്തെടുത്തു കൊണ്ടാണ് കളിക്കുന്നത്. മികച്ച ഒരു പരിശീലകന് കീഴിൽ ഹൃദയം കൊണ്ടാണ് അവർ ഇപ്പോൾ കളിക്കുന്നത് ” ഇതാണ് വിദാൽ പറഞ്ഞിട്ടുള്ളത്.

തകർപ്പൻ പ്രകടനമാണ് ഇന്റർ മയാമി ഇപ്പോൾ നടത്തുന്നത്. അതേസമയം ബ്രസീലിയൻ ക്ലബ്ബായ അത്ലറ്റിക്കോ പരാനൻസിന്റെ താരമാണ് നിലവിൽ വിദാൽ. ചിലിയുടെ ദേശീയ ടീമിനുവേണ്ടി 140 മത്സരങ്ങൾ ഇദ്ദേഹം കളിച്ചിട്ടുണ്ട്.