മെസ്സിയെ ആദരിച്ച് ഇന്റർമയാമി,പ്രതികരണം രേഖപ്പെടുത്തി താരം

ഇന്നലെ അമേരിക്കൻ ലീഗിൽ നടന്ന മത്സരത്തിൽ വിജയം നേടാൻ ഇന്റർമയാമിക്ക് സാധിച്ചിരുന്നു. ഒന്നിനെതിരെ 2 ഗോളുകൾക്കായിരുന്നു അവർ ഷിക്കാഗോയെ പരാജയപ്പെടുത്തിയത്. പരിക്ക് കാരണം ലയണൽ മെസ്സി മത്സരത്തിൽ പങ്കെടുത്തിരുന്നില്ല. എന്നാൽ ഇന്റർ മയാമി ഈ മത്സരത്തിനു മുന്നേ മെസ്സിയെ ആദരിച്ചിരുന്നു.

അർജന്റീനക്കൊപ്പം കോപ്പ അമേരിക്ക കിരീടം നേടിയതോടെ ലയണൽ മെസ്സി ഒരു റെക്കോർഡ് കരസ്ഥമാക്കിയിരുന്നു. ഫുട്ബോൾ ചരിത്രത്തിൽ ഏറ്റവും കൂടുതൽ കിരീടങ്ങൾ ഉള്ള താരം എന്ന റെക്കോർഡ് മെസ്സിയുടെ പേരിലാണ്. 45 കിരീടങ്ങളാണ് മെസ്സി നേടിയിട്ടുള്ളത്. ഇത് രേഖപ്പെടുത്തിയ ഒരു ഫ്രെയിം അദ്ദേഹത്തിന് ഇന്റർ മയാമി സമ്മാനിച്ചിരുന്നു. മാത്രമല്ല വലിയ ആരവത്തോടുകൂടിയാണ് തങ്ങളുടെ ക്യാപ്റ്റനെ ഇന്റർ മയാമി ആരാധകർ വരവേറ്റത്.

ഏതായാലും തനിക്ക് ലഭിച്ച ഈ ആദരവിൽ നന്ദി പറഞ്ഞിട്ടുണ്ട്. ഇൻസ്റ്റഗ്രാമിലൂടെയാണ് മെസ്സി തന്റെ ക്ലബ്ബിന് നന്ദി പറഞ്ഞിട്ടുള്ളത്.മെസ്സിയുടെ വാക്കുകൾ ഇങ്ങനെയാണ്.

“നിങ്ങളുടെ ഈ ആദരവിന് വളരെയധികം നന്ദി ഇന്റർമയാമി. കളിക്കളത്തിൽ നമ്മുടെ ആളുകളോടൊപ്പം ഈ നിമിഷം പങ്കിടാൻ കഴിഞ്ഞതിൽ എനിക്ക് വളരെയധികം സന്തോഷമുണ്ട് “ഇതായിരുന്നു മെസ്സി കുറിച്ചിരുന്നത്.

ലയണൽ മെസ്സിയുടെ അഭാവത്തിലും മികച്ച പ്രകടനമാണ് ഇന്റർമയാമി ഇപ്പോൾ നടത്തിക്കൊണ്ടിരിക്കുന്നത്.പോയിന്റ് പട്ടികയിലെ ഒന്നാം സ്ഥാനം ഇന്റർമയാമിയുടെ കൈവശം ഭദ്രമാണ്.5 പോയിന്റിന്റെ ലീഡ് ഇപ്പോൾ ഇന്റർമയാമിക്കുണ്ട്. മെസ്സിയുടെ അഭാവത്തിൽ തന്നെയായിരിക്കും ഇനിയുള്ള കുറച്ച് മത്സരങ്ങൾ ഈ ക്ലബ്ബ് കളിക്കുക.