ബാഴ്സ വിട്ടത് ആഗ്രഹപ്രകാരമല്ല, അടുത്ത സീസണിൽ എനിക്കും മെസ്സിക്കും ഗോളടിച്ചു കൂട്ടണം:ആൽബ

ഇന്ന് നടന്ന സൗഹൃദ മത്സരത്തിൽ ഇന്റർ മയാമിക്ക് പരാജയം ഏൽക്കേണ്ടി വന്നിരുന്നു. സ്വന്തം മൈതാനത്ത് വെച്ചുകൊണ്ട് നടന്ന മത്സരത്തിൽ ഒന്നിനെതിരെ രണ്ടു ഗോളുകൾക്കായിരുന്നു മയാമി പരാജയപ്പെട്ടത്.ന്യൂയോർക്ക് സിറ്റി എഫ്സിക്കെതിരെയായിരുന്നു ഈ മത്സരം കളിച്ചിരുന്നത്. സ്വന്തം ആരാധകർക്ക് മുന്നിൽ ലയണൽ മെസ്സിയുടെ ബാലൺ ഡി’ഓർ പ്രദർശിപ്പിക്കുക എന്ന ഉദ്ദേശത്തോടുകൂടിയായിരുന്നു പ്രധാനമായും ഈ മത്സരം സംഘടിപ്പിച്ചിരുന്നത്.

ഈ മത്സരത്തിനുശേഷം ലയണൽ മെസ്സിയെക്കുറിച്ച് ചില കാര്യങ്ങൾ അദ്ദേഹത്തിന്റെ സഹതാരമായ ജോർഡി ആൽബ പങ്കുവെച്ചിട്ടുണ്ട്. മെസ്സി ബാഴ്സ വിട്ടത് അദ്ദേഹത്തിന്റെ ആഗ്രഹപ്രകാരമായിരുന്നില്ല എന്നാണ് ആൽബ പറഞ്ഞിട്ടുള്ളത്. അടുത്ത സീസണിൽ തനിക്കും മെസ്സിക്കും ചേർന്നുകൊണ്ട് ഒരുപാട് ഗോളുകൾ നേടാനാകുമെന്നുള്ള പ്രതീക്ഷയും ആൽബ പങ്കുവെച്ചിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

“ലയണൽ മെസ്സിയുടെ ആഗ്രഹപ്രകാരമോ, അല്ലെങ്കിൽ ഞങ്ങളുടെ ആഗ്രഹപ്രകാരമോ അല്ലായിരുന്നു മെസ്സിക്ക് ബാഴ്സലോണ വിടേണ്ടിവന്നത്. ക്ലബ്ബ് വിട്ടതിനുശേഷം മെസ്സി രണ്ടുവർഷം പാരീസിൽ ചെലവഴിച്ചു.പക്ഷേ അത് നല്ല രീതിയിൽ അല്ല കലാശിച്ചത്.പക്ഷേ അദ്ദേഹം തിരിച്ചുവന്നു, ഇപ്പോഴും മികച്ച താരമാണെന്ന് വീണ്ടും തെളിയിച്ചു.അടുത്ത വർഷം എനിക്കും മെസ്സിക്കും ഒരുമിച്ച് ചേർന്നുകൊണ്ട് ഗോളുകളും അസിസ്റ്റുകളും നേടാൻ കഴിയുമെന്ന് ഞാൻ പ്രതീക്ഷിക്കുന്നു ” ഇതാണ് ജോർഡി ആൽബ പറഞ്ഞിട്ടുള്ളത്.

അമേരിക്കയിലെ അടുത്ത സീസൺ ഫെബ്രുവരി അവസാനത്തിലോ മാർച്ച് തുടക്കത്തിലോ ആയിരിക്കും ആരംഭിക്കുക. അതിനു മുന്നേ ഇന്റർ മയാമി പ്രീ സീസൺ സൗഹൃദം മത്സരങ്ങൾ കളിച്ചേക്കും. അതേസമയം വരുന്ന ഇന്റർനാഷണൽ ബ്രേക്കിൽ അർജന്റീനക്കൊപ്പം ഉറുഗ്വ, ബ്രസീൽ എന്നിവരെയാണ് മെസ്സി നേരിടുക.