പൊളിച്ചടുക്കി മെസ്സി,ഇന്റർ മയാമി ചാമ്പ്യൻസ് കപ്പ്  ക്വാർട്ടറിൽ

ഇന്ന് കോൺകകാഫ് ചാമ്പ്യൻസ് കപ്പിൽ നടന്ന രണ്ടാം പാദ പ്രീ ക്വാർട്ടർ പോരാട്ടത്തിൽ ഇന്റർ മയാമിക്ക് വിജയം. ഒന്നിനെതിരെ മൂന്ന് ഗോളുകൾക്കാണ് എതിരാളികളായ നാഷ് വില്ലെ എസ്സിയെ അവർ പരാജയപ്പെടുത്തിയിട്ടുള്ളത്. സൂപ്പർ താരം ലയണൽ മെസ്സി തന്നെയാണ് മത്സരത്തിൽ തിളങ്ങിയിട്ടുള്ളത്. രണ്ട് പാദങ്ങളിലുമായി 5-3ന്റെ വിജയം കരസ്ഥമാക്കിയ ഇന്റർ മയാമി ക്വാർട്ടർ ഫൈനലിൽ പ്രവേശിക്കുകയും ചെയ്തു.

പരിക്കിന്റെ പ്രശ്നങ്ങൾ ഉണ്ടായിട്ടും മത്സരത്തിന്റെ സ്റ്റാർട്ടിങ് ഇലവനിൽ മെസ്സി ഉണ്ടായിരുന്നു. മത്സരത്തിന്റെ എട്ടാം മിനിറ്റിൽ തന്നെ ലൂയിസ് സുവാരസ്‌ ഗോൾ കണ്ടത്തുകയായിരുന്നു. ലയണൽ മെസ്സി നീക്കി നൽകിയ ബോൾ സുവാരസ് പിഴവുകൾ ഒന്നും കൂടാതെ ഫിനിഷ് ചെയ്തു.പിന്നീട് ഇരുപത്തിമൂന്നാം മിനിറ്റിൽ ലയണൽ മെസ്സിയുടെ ഗോൾ വന്നു.ഡിയഗോ ഗോമസാണ് അസിസ്റ്റ് നൽകിയത്. മെസ്സിയുടെ ലെഫ്റ്റ് ഫൂട്ട് ഷോട്ട് വലയിൽ പതിക്കുകയായിരുന്നു.

ഈ രണ്ട് ഗോളുകളുടെ ലീഡിലാണ് ആദ്യപകുതി ഇന്റർമയാമി അവസാനിപ്പിച്ചത്. പിന്നീട് അമ്പതാം മിനിറ്റിൽ മെസ്സിയെ പിൻവലിച്ചു റോബർട്ട് ടൈലറിനെ ഇറക്കി.63ആം മിനുട്ടിൽ ടൈലർ ഒരു ഹെഡർ ഗോൾ നേടിയതോടെ ഇന്റർമയാമി വിജയം ഉറപ്പാക്കിയിരുന്നു. മത്സരത്തിന്റെ ഏറ്റവും അവസാനത്തിൽ എതിരാളികൾ ഒരു ഗോൾ നേടിയെങ്കിലും അത് മതിയാകുമായിരുന്നില്ല.ഏതായാലും വിജയ വഴിയിലേക്ക് തിരിച്ചെത്താൻ കഴിഞ്ഞതിന്റെ ആശ്വാസത്തിലാണ് ഇപ്പോൾ ഇന്റർമയാമി ആരാധകരുള്ളത്.