കിടിലൻ ഗോളുമായി മെസ്സി,22 പെനാൽറ്റികൾക്കൊടുവിൽ ഇന്റർ മയാമിക്ക് കിരീടം!

ഇന്ന് ലീഗ്സ് കപ്പിൽ നടന്ന കലാശ പോരാട്ടത്തിൽ ലയണൽ മെസ്സിയുടെ ക്ലബ്ബായ ഇന്റർ മയാമിക്ക് വിജയം. പെനാൽറ്റി ഷൂട്ടൗട്ടിൽ 10-9 എന്ന സ്കോറിന് നാഷ്‌വിൽ എസ്സിയെ പരാജയപ്പെടുത്തി കൊണ്ടാണ് ഇന്റർ മയാമി ആദ്യത്തെ കിരീടം സ്വന്തമാക്കിയിരിക്കുന്നത്.സൂപ്പർ താരം ലയണൽ മെസ്സി ഈ മത്സരത്തിലും ഗോൾ നേടുകയായിരുന്നു.

നാഷ്‌വിൽ എസ്സിയുടെ മൈതാനത്ത് വെച്ചുകൊണ്ടാണ് ഈ മത്സരം നടന്നത്. ലയണൽ മെസ്സിയിലൂടെയാണ് ഇന്റർ മയാമി അക്കൗണ്ട് ഓപ്പൺ ആക്കിയത്. മത്സരത്തിന്റെ 23ആം മിനിട്ടിൽ കിടിലൻ ഒരു ഷോട്ടിലൂടെയാണ് ലയണൽ മെസ്സി വല കുലുക്കിയത്. അതിനുശേഷം രണ്ടാം പകുതിയിൽ നാഷ്‌വിൽ എസ്സി ഗോൾ മടക്കി.ഇതോടെ മത്സരം പെനാൽറ്റി ഷൂട്ടൗട്ടിലേക്ക് നീങ്ങി.

ആദ്യത്തെ അഞ്ച് പെനാൽറ്റികൾ എടുത്തപ്പോൾ രണ്ട് ടീമുകളും ഓരോ പെനാൽറ്റികൾ വീതം പാഴാക്കുകയായിരുന്നു.ഇതോടെ പെനാൽറ്റി ഷൂട്ടൗട്ട് നീണ്ടു. ഒടുവിൽ ഗോൾ കീപ്പർമാർ തമ്മിൽ പെനാൽറ്റി എടുക്കേണ്ടി വന്നു.നാഷ്‌വിൽ എസ്സി ഗോൾകീപ്പറുടെ പെനാൽറ്റി ഇന്റർ മയാമി ഗോൾകീപ്പർ തടഞ്ഞിട്ടതോടെ മത്സരത്തിന് വിരാമമായി.ഇന്റർ മായാമി കിരീടം നേടുകയായിരുന്നു.

22 പെനാലിറ്റികൾക്കൊടുവിലാണ് ഇനി മത്സരത്തിന്റെ ഫലം നിർണയിക്കപ്പെട്ടത്.ഏതായാലും ആദ്യ കിരീടം നേടിയതിന്റെ ആവേശത്തിലാണ് ഇന്റർമയാമി ഉള്ളത്.