എങ്ങനെയാണ് മെസ്സിയെയും സുവാരസിനെയും പൂട്ടിയത്? അറ്റ്ലാന്റ പരിശീലകൻ പറയുന്നു!

ഇന്ന് അമേരിക്കൻ ലീഗിൽ നടന്ന മത്സരത്തിൽ ഇന്റർമയാമിക്ക് പരാജയം ഏറ്റുവാങ്ങേണ്ടി വന്നിരുന്നു. ഒന്നിനെതിരെ മൂന്നു ഗോളുകൾക്കായിരുന്നു ഇന്റർമയാമി പരാജയപ്പെട്ടത്. സ്വന്തം മൈതാനത്ത് വച്ച് നടന്ന മത്സരത്തിൽ മെസ്സിയാണ് മയാമിയുടെ ആശ്വാസ ഗോൾ നേടിയത്. പക്ഷേ മത്സരത്തിൽ മികച്ച പ്രകടനം നടത്തിയ അറ്റ്ലാന്റ അർഹിച്ച വിജയമാണ് സ്വന്തമാക്കിയത്.

മെസ്സി,സുവാരസ്‌,ബുസ്ക്കെറ്റ്സ് എന്നിവരൊക്കെ അടങ്ങിയ താരനിരയെ എങ്ങനെയാണ് പിടിച്ചുകെട്ടിയത്? എങ്ങനെയാണ് പരാജയപ്പെടുത്തിയത് എന്നതിനെക്കുറിച്ച് അറ്റ്ലാന്റയുടെ പരിശീലകൻ സംസാരിച്ചിട്ടുണ്ട്. ഇവരെ രണ്ടുപേരെയും ഡിഫൻഡ് ചെയ്യാൻ സദാസമയവും മൂന്നു താരങ്ങളെ താൻ നിയോഗിച്ചിരുന്നു എന്നാണ് അറ്റ്ലാന്റ പരിശീലകൻ പറഞ്ഞിട്ടുള്ളത്.ഗോൺസാലോ പിനേഡയുടെ വാക്കുകൾ ഇങ്ങനെയാണ്.

“മെസ്സിയും സുവാരസും മികച്ച താരങ്ങളാണ്. ആ രണ്ടുപേരെയും ഡിഫൻഡ് ചെയ്യാൻ സദാസമയവും മൂന്നുപേർ വേണമെന്ന് ഞാൻ തീരുമാനിച്ചു.അത്തരം സന്ദർഭങ്ങളിൽ വളരെ മികച്ച രൂപത്തിൽ തന്നെ എന്റെ താരങ്ങൾ കാര്യങ്ങൾ കൈകാര്യം ചെയ്തു. ചില ഘട്ടങ്ങളിൽ അവരെ ഡിഫൻഡ് ചെയ്യാൻ ഞങ്ങൾ ബുദ്ധിമുട്ടിയിരുന്നു.അവരെ കൃത്യമായ റീഡ് ചെയ്യാൻ സാധിച്ചിരുന്നില്ല.പക്ഷേ പിന്നീട് ഈ മൂന്ന് താരങ്ങൾ നല്ല രീതിയിൽ തന്നെ ചെയ്തു. അതുകൊണ്ടുതന്നെ ട്രാൻസിഷൻ പിരീഡിൽ മധ്യനിര പ്രൊട്ടക്ട് ചെയ്യാൻ എനിക്ക് കഴിഞ്ഞു “ഇതാണ് എതിർ പരിശീലകൻ പറഞ്ഞിട്ടുള്ളത്.

മത്സരത്തിൽ മെസ്സി ഒരു മികച്ച ഗോൾ നേടിയെങ്കിലും അത് മതിയാകുമായിരുന്നില്ല. തോൽവി ഇന്റർമയാമിക്ക് ക്ഷീണം ചെയ്യുന്ന കാര്യമാണ്. അടുത്ത സെന്റ് ലൂയിസ് സിറ്റിക്കെതിരെയുള്ള മത്സരത്തിൽ കൂടി മെസ്സി കളിക്കും. പിന്നീട് കോപ്പ അമേരിക്ക കാരണം ഇന്റർമയാമിയുടെ 5 മത്സരങ്ങൾ മെസ്സിക്ക് നഷ്ടമാകും.