ആശങ്കപ്പെടേണ്ടതുണ്ടോ? മെസ്സി എന്തുകൊണ്ട് ബെഞ്ചിലായി? ഇന്റർ മയാമി കോച്ച് പറയുന്നു!
ഇന്നലെ അമേരിക്കൻ ലീഗിൽ നടന്ന മത്സരത്തിൽ വിജയം നേടാൻ ഇന്റർമയാമിക്ക് സാധിച്ചിരുന്നു. ഏകപക്ഷീയമായ ഒരു ഗോളിനാണ് ടോറോന്റോ എഫ്സിയെ അവർ പരാജയപ്പെടുത്തിയത്. മത്സരത്തിന്റെ ഏറ്റവും അവസാനത്തിൽ കംപാന നേടിയ ഗോളാണ് അവർക്ക് വിജയം സമ്മാനിച്ചിട്ടുള്ളത്. ഇനി റെഗുലർ സീസണിൽ ഒരു മത്സരം കൂടിയാണ് അവർക്ക് അവശേഷിക്കുന്നത്.
ഇന്നലത്തെ മത്സരത്തിന്റെ സ്റ്റാർട്ടിങ് ഇലവനിൽ ലയണൽ മെസ്സി ഉണ്ടായിരുന്നില്ല. പകരം മത്സരത്തിന്റെ അവസാന 30 മിനിട്ടുകൾ മാത്രമാണ് അദ്ദേഹം കളിച്ചത്. പക്ഷേ ഇവിടെ കാര്യത്തിൽ ആശങ്കപ്പെടേണ്ടതുണ്ടോ? എന്തുകൊണ്ടാണ് അദ്ദേഹത്തെ പുറത്തിരുത്തിയത് എന്നുള്ള ചോദ്യത്തിന് പരിശീലകനായ മാർട്ടിനോ മറുപടി നൽകിയിട്ടുണ്ട്.റൊട്ടേഷന്റെ ഭാഗമായി കൊണ്ടാണ് മെസ്സിക്ക് വിശ്രമം നൽകിയതെന്നും അല്ലാതെ ആശങ്കപ്പെടേണ്ട കാര്യമില്ല എന്നുമാണ് പരിശീലകൻ പറഞ്ഞിട്ടുള്ളത്.അദ്ദേഹത്തിന്റെ വാക്കുകൾ ഇങ്ങനെയാണ്.
” ചില താരങ്ങൾക്ക് വിശ്രമം നൽകണം എന്നുള്ളത് നേരത്തെ തന്നെ ഞങ്ങൾ തീരുമാനിച്ചിരുന്നു. നിരവധി മത്സരങ്ങൾ കളിക്കേണ്ടി വരുന്നതുകൊണ്ട് തന്നെ റൊട്ടേഷൻ അനിവാര്യമാണ്. രണ്ട് ലക്ഷ്യങ്ങൾ ആയിരുന്നു ഞങ്ങൾക്ക് ഈ മത്സരത്തിൽ ഉണ്ടായിരുന്നത്.ചില താരങ്ങൾക്ക് വിശ്രമം നൽകുക,അതോടൊപ്പം തന്നെ വിജയം നേടിക്കൊണ്ടു മൂന്ന് പോയിന്റുകൾ സ്വന്തമാക്കുക. ഇത് രണ്ടും പൂർത്തിയാക്കാൻ ഞങ്ങൾക്ക് സാധിച്ചു. മെസ്സിക്ക് വിശ്രമം നൽകിയതും അതിന്റെ ഭാഗമാണ് ” ഇതാണ് ഇന്റർമയാമി പരിശീലകൻ പറഞ്ഞിട്ടുള്ളത്.
ഇനി മെസ്സിയെ അർജന്റീന ദേശീയ ടീമിനോടൊപ്പം ആണ് കാണാൻ കഴിയുക. ആദ്യ മത്സരത്തിൽ വെനിസ്വേലയാണ് അവരുടെ എതിരാളികൾ.ഒക്ടോബർ പതിനൊന്നാം തീയതി പുലർച്ചെയാണ് ഈ മത്സരം നടക്കുക. പിന്നീട് ബൊളീവിയയെ ഒക്ടോബർ പതിനാറാം തീയതിയാണ് അർജന്റീന നേരിടുക. ഈ രണ്ട് മത്സരങ്ങളിലും മെസ്സി കളിക്കും എന്നാണ് പ്രതീക്ഷിക്കപ്പെടുന്നത്.
