അസാധ്യമായത് ചെയ്യുന്നു,GOAT മെസ്സി തന്നെ:മുൻ റയൽ മാഡ്രിഡ് താരം

സൂപ്പർ താരം ലയണൽ മെസ്സി ഇപ്പോൾ പരിക്കിന്റെ പിടിയിലാണ് ഉള്ളത്. അതുകൊണ്ടുതന്നെ കഴിഞ്ഞ കോൺകകാഫ് ചാമ്പ്യൻസ് കപ്പ് ക്വാർട്ടർ ഫൈനൽ മത്സരം കളിക്കാൻ മെസ്സിക്ക് സാധിച്ചിരുന്നില്ല. മെക്സിക്കൻ ക്ലബ്ബായ മോന്റെറി ആ മത്സരത്തിൽ ഇന്റർമയാമിയെ പരാജയപ്പെടുത്തിയിരുന്നു. നിലവിൽ മോന്റെറിക്ക് വേണ്ടിയാണ് സ്പാനിഷ് താരമായ സെർജിയോ കനാലസ് കളിച്ചുകൊണ്ടിരിക്കുന്നത്.മുൻപ് റയൽ മാഡ്രിഡിന് വേണ്ടി കളിച്ചിട്ടുള്ള താരം കൂടിയാണ് ഇദ്ദേഹം.

ലയണൽ മെസ്സിയെക്കുറിച്ച് ചില കാര്യങ്ങൾ ഇപ്പോൾ ഇദ്ദേഹം പറഞ്ഞിട്ടുണ്ട്. അതായത് തന്നെ സംബന്ധിച്ചിടത്തോളം ചരിത്രത്തിലെ ഏറ്റവും മികച്ച താരം മെസ്സിയാണ് എന്നാണ് കനാലസ് പറഞ്ഞിട്ടുള്ളത്. അസാധ്യമായ കാര്യങ്ങളാണ് മെസ്സി ചെയ്യുന്നതെന്നും ഇദ്ദേഹം കൂട്ടിച്ചേർത്തിട്ടുണ്ട്.കനാലസിന്റെ വാക്കുകൾ ഇങ്ങനെയാണ്.

” മറ്റുള്ള താരങ്ങളിൽ നിന്നും ലയണൽ മെസ്സിയെ മാറ്റിനിർത്തുന്നത് 20 വർഷത്തോളം ഒരേ ലെവലിൽ കളിക്കുന്നു എന്നുള്ളതാണ്. ഉയർന്ന ലെവലിലാണ് മെസ്സി ഇപ്പോഴും കളിച്ചു കൊണ്ടിരിക്കുന്നത്.ക്രിസ്റ്റ്യാനോ റൊണാൾഡോയും ഈ ഗണത്തിൽ പെടുന്ന ഒരു താരമാണ്. ഇവർ രണ്ടുപേരുമാണ് ഗോളുകളും അസിസ്റ്റുകളും നേടിക്കൊണ്ട് ഇത്രയും കാലം തങ്ങളുടെ ടീമുകൾക്ക് കിരീടങ്ങൾ നേടിക്കൊടുത്തവർ. എന്നെ സംബന്ധിച്ചിടത്തോളം ചരിത്രത്തിലെ ഏറ്റവും മികച്ചതാരം ലയണൽ മെസ്സിയാണ്.അദ്ദേഹം ഉണ്ടാകുമ്പോൾ അത് സഹതാരങ്ങൾക്ക് ഒരു ആശ്വാസമാണ്. ഇത്രയും കാലം മികച്ച പ്രകടനം നടത്തുക എന്നുള്ളത് തികച്ചും അസാധ്യമായ ഒരു കാര്യം തന്നെയാണ് ” ഇതാണ് സെർജിയോ കനാലസ് പറഞ്ഞിട്ടുള്ളത്.

ലയണൽ മെസ്സി ഈ സീസണിലും മികച്ച പ്രകടനം നടത്തുന്നുണ്ട്.പക്ഷേ സമീപകാലത്ത് പരിക്കുകൾ വല്ലാതെ മെസ്സിയെ അലട്ടുന്നുണ്ട്. ഒരുപാട് മത്സരങ്ങൾ മെസ്സിക്ക് നഷ്ടമായിരുന്നു.മോന്റെരിക്കെതിരെയുള്ള രണ്ടാം പാദ മത്സരത്തിൽ എങ്കിലും പൂർണ്ണ സജ്ജനായി കൊണ്ട് മെസ്സി ഉണ്ടാകും എന്നാണ് ആരാധകരുടെ പ്രതീക്ഷകൾ.