മെസ്സി ഇന്റർ മിയാമിയിലേക്കോ? ഹിഗ്വയ്ൻ പറയുന്നു!

സൂപ്പർ താരം ലയണൽ മെസ്സിയെ സ്വന്തമാക്കാൻ ഡേവിഡ് ബെക്കാമിന്റെ ഇന്റർ മിയാമിക്ക്‌ താല്പര്യമുണ്ട് എന്നുള്ള കാര്യം നേരത്തെ തന്നെ വ്യക്തമായതാണ്. മാത്രമല്ല അമേരിക്കയിൽ കളിക്കാനുള്ള ആഗ്രഹം മെസ്സി മുമ്പ് ഒരു അഭിമുഖത്തിൽ വ്യക്തമാക്കുകയും ചെയ്തിരുന്നു. ഏതായാലും മെസ്സി ഇന്റർ മിയാമിയിലേക്ക് എത്തുന്നതുമായി ബന്ധപ്പെട്ടുള്ള തന്റെ അഭിപ്രായമിപ്പോൾ മെസ്സിയുടെ മുൻ സഹതാരവും നിലവിൽ ഇന്റർമിയാമി താരവുമായ ഗോൺസാലോ ഹിഗ്വയ്‌ൻ അറിയിച്ചിട്ടുണ്ട്. മെസ്സി ഇന്ററിലേക്ക് എത്തുമോ എന്നറിയില്ലെന്നും എന്നാൽ ക്ലബ്ബിന് അദ്ദേഹത്തിൽ ആഗ്രഹമുണ്ട് എന്നുമാണ് ഹിഗ്വയ്ൻ അറിയിച്ചിട്ടുള്ളത്.അദ്ദേഹത്തിന്റെ വാക്കുകൾ ഇഎസ്പിഎൻ റിപ്പോർട്ട്‌ ചെയ്തിരിക്കുന്നത് ഇങ്ങനെയാണ്.

” ഞാനൊരു പ്രശ്നം ഉണ്ടാക്കാൻ ആഗ്രഹിക്കുന്നില്ല. മെസ്സി മിയാമിയിലേക്ക് എത്തുമോ എന്നുള്ള കാര്യത്തിൽ എനിക്കൊന്നുമറിയില്ല.അദ്ദേഹം പിഎസ്ജിയുമായി രണ്ട് വർഷത്തെ കരാറിലാണ് ഒപ്പ് വെച്ചിരിക്കുന്നത്. പക്ഷേ ക്ലബ്ബിന് അദ്ദേഹത്തിൽ ആഗ്രഹമുണ്ട്. എന്താണ് സംഭവിക്കുക എന്നുള്ളത് കാത്തിരുന്നു കാണാം ” ഹിഗ്വയ്ൻ പറഞ്ഞു.

അതേസമയം അർജന്റൈൻ ടീമിലേക്ക് മടങ്ങി വരുമോ എന്നുള്ള ചോദ്യത്തിന് അതിന് സാധ്യതയില്ലെന്നും ഹിഗ്വയ്ൻ മറുപടി നൽകിയിട്ടുണ്ട്. ” അർജന്റീന ടീമിൽ തിരിച്ചെത്തുന്നതിനുള്ള സാധ്യതകൾ ഞാൻ കാണുന്നില്ല.ഞാൻ ഒരുപാട് വർഷക്കാലം ആ ജേഴ്സി അണിഞ്ഞതാണ്. ഇപ്പോൾ ദേശീയ ടീമിൽ നിന്ന് ഞാനും എന്റെ ചിന്തകളും പൂർണ്ണമായും വേർപ്പെട്ടിട്ടുണ്ട്.ഇപ്പോൾ ഞാൻ എന്റെ ജീവിതത്തിന്റെ മറ്റൊരു ഘട്ടത്തിലാണ്. ഞാൻ എന്റെ കുടുംബത്തിനാണ് ഇപ്പോൾ പ്രാധാന്യം നൽകുന്നത്.എന്റെ മകളുടെ പുഞ്ചിരി കാണാനുള്ള അവസരത്തെ ഞാൻ ഒന്നിന് വേണ്ടിയും ഒഴിവാക്കുകയില്ല ” ഇതാണ് ഹിഗ്വയ്‌ൻ പറഞ്ഞത്.

2019 ൽ അർജന്റീന ടീമിൽ നിന്നും വിരമിച്ച ഹിഗ്വയ്ൻ 75 മത്സരങ്ങളിൽ നിന്ന് 31 ഗോളുകൾ നേടിയിട്ടുണ്ട്.