പരേഡസിനെ ടീമിലെത്തിക്കാനുള്ള ശ്രമങ്ങളാരംഭിച്ച് വമ്പൻമാർ!

പിഎസ്ജിയുടെ അർജന്റൈൻ മധ്യനിര താരം ലിയാൻഡ്രോ പരേഡസിന് വേണ്ടി ഇറ്റാലിയൻ വമ്പൻമാരായ യുവന്റസ് രംഗത്ത്.ലാ റിപബ്ലിക്കയെ ഉദ്ധരിച്ചു കൊണ്ട് ഫുട്ബോൾ ഇറ്റാലിയയാണ് ഇക്കാര്യം റിപ്പോർട്ട്‌ ചെയ്തിരിക്കുന്നത്. പരിക്കേറ്റ് പുറത്തിരിക്കുന്ന മധ്യനിര താരം ആർതർ മെലോയുടെ സ്ഥാനത്തേക്കാണ് പരേഡസിനെ യുവന്റസ് പരിഗണിക്കുന്നത്. സർജറി കഴിഞ്ഞ ആർതറിന് മൂന്ന് മാസത്തോളം വിശ്രമം ആവിശ്യമാണ്. അത്കൊണ്ടാണ് പുതിയൊരു താരത്തെ കൂടി യുവന്റസ് ലക്ഷ്യം വെക്കുന്നത്. 27-കാരനായ താരത്തെ വാങ്ങാനുള്ള ഓപ്ഷൻ ഉൾപ്പെടുത്തി കൊണ്ടുള്ള ലോണിൽ ടീമിലെത്തിക്കാനാണ് യുവന്റസ് പദ്ധതിയിട്ടിരിക്കുന്നത്.

എന്നാൽ പിഎസ്ജി താരത്തെ കൈവിടുമോ എന്നുള്ള കാര്യം ദുരൂഹമാണ്. ക്ലബ് വിടാനുള്ള യാതൊരു വിധ താല്പര്യവും ഇത്‌ പരേഡസ് കാണിച്ചിട്ടുമില്ല.മുമ്പ് ഇറ്റാലിയൻ സിരി എയിൽ റോമക്ക്‌ വേണ്ടി കളിച്ചിട്ടുള്ള താരമാണ് പരേഡസ്. പിന്നീടാണ് താരം സെനിത് സെന്റ് പീറ്റേഴ്സ്ബർഗിലേക്ക് ചേക്കേറിയത്.2019-ൽ 40 മില്യൺ യൂറോക്ക്‌ താരം പിഎസ്ജിയിൽ എത്തുകയായിരുന്നു.2023 വരെയാണ് നിലവിൽ താരത്തിന് പിഎസ്ജിയുമായി കരാറുള്ളത്.അതേസമയം മറ്റൊരു മധ്യനിര താരമായ ലൊക്കാടെല്ലിക്ക്‌ വേണ്ടിയുള്ള കഠിനശ്രമത്തിലാണ് യുവന്റസ്. ബൊറൂസിയ, ആഴ്സണൽ എന്നിവരൊക്കെ തന്നെയും യുവന്റസിന് വെല്ലുവിളി ഉയർത്തുന്നുണ്ട്.