നെയ്മർ-മെസ്സി എന്നിവർക്കൊപ്പം കളിക്കുന്നതിനെ കുറിച്ച് എംബപ്പേക്ക് പറയാനുള്ളത്.

ഈ ട്രാൻസ്ഫർ ജാലകത്തിൽ ലയണൽ മെസ്സി എത്തിയതോട് കൂടിയാണ് പിഎസ്ജിയിൽ പുതിയൊരു ത്രയം പിറന്നിരുന്നത്. മെസ്സി, നെയ്മർ, എംബപ്പേ സഖ്യം ഒരുമിച്ച് കളിച്ചിട്ടുണ്ടെങ്കിലും പ്രതീക്ഷിച്ച നിലവാരത്തിലേക്ക് ഉയരാൻ ഇവർക്ക് കഴിഞ്ഞിട്ടില്ല. എന്നിരുന്നാലും എംബപ്പേ മിന്നും ഫോമിലാണ് ഈ സീസണിൽ കളിക്കുന്നത്.

ഏതായാലും മെസ്സി-നെയ്മർ എന്നിവർക്കൊപ്പം കളിക്കുന്നതിനെ കുറിച്ചിപ്പോൾ എംബപ്പേ തുറന്ന് പറഞ്ഞിട്ടുണ്ട്. ഇരുവരും മികച്ച സഹതാരങ്ങളാണ് എന്നാണ് എംബപ്പേ അറിയിച്ചിട്ടുള്ളത്. കൂടാതെ മെസ്സിയോടൊപ്പമുള്ള ആദ്യ ട്രെയിനിങ് സെഷൻ അനുഭവങ്ങളും എംബപ്പേ പങ്കു വെച്ചു.അദ്ദേഹത്തിന്റെ വാക്കുകൾ പാരീസ് ഫാൻസ്‌ റിപ്പോർട്ട്‌ ചെയ്യുന്നത് ഇങ്ങനെയാണ്.

” അവർ നല്ല വ്യക്തികളാണ്.നമ്മൾ എല്ലാവരെ പോലെയും സമ്പാദിക്കാൻ വേണ്ടി വർക്ക്‌ ചെയ്യുന്നവരാണ്. അതിനേക്കാളുമുപരി മികച്ച സഹതാരങ്ങളാണ്.മെസ്സിയോടൊപ്പമുള്ള ആദ്യ ട്രെയിനിങ് സെഷൻ എനിക്ക് നന്നായി ഓർമ്മയുണ്ട്.അദ്ദേഹം എന്നെ അത്ഭുതപ്പെടുത്തി കളഞ്ഞു. കാരണം അദ്ദേഹം ചെയ്യുന്ന കാര്യങ്ങളെല്ലാം വളരെ സാധാരണ രൂപത്തിലാണ്.കളത്തിൽ എന്താണോ ആവിശ്യമുള്ളത് അതെല്ലാം ചെയ്യാൻ മെസ്സിക്ക് സാധിക്കും.അദ്ദേഹം എന്റെ ടീമിലുള്ളത് മഹത്തായ ഒരു കാര്യമാണ് ” ഇതാണ് എംബപ്പേ പറഞ്ഞിട്ടുള്ളത്.

എന്നാൽ ഈ ത്രയത്തെ ദീർഘകാലം മുന്നോട്ട് കൊണ്ട് പോവാനുള്ള ശ്രമങ്ങളിലാണ് നിലവിൽ പിഎസ്ജിയുള്ളത്. എന്തെന്നാൽ ഈ സീസണോട് കൂടി കരാർ അവസാനിക്കുന്ന എംബപ്പേ ഇതുവരെ കരാർ പുതുക്കാത്തത് ക്ലബ്ബിന് ഒരല്പം ആശങ്ക നൽകുന്ന കാര്യമാണ്.