നെയ്മർ, ഡിമരിയ, പരേഡസ് എന്നിവർക്ക് കോവിഡ് സ്ഥിരീകരിച്ചു !

പിഎസ്ജിയുടെ സൂപ്പർ താരങ്ങളായ നെയ്മർ ജൂനിയർ, എയ്ഞ്ചൽ ഡിമരിയ, പരേഡസ് എന്നിവർക്ക് കോവിഡ് സ്ഥിരീകരിച്ചതായി റിപ്പോർട്ടുകൾ. പ്രമുഖഫ്രഞ്ച് മാധ്യമങ്ങളായ എൽ എക്വിപ്പെ, ഫ്രാൻസ് ഫുട്ബോൾ എന്നിവരാണ് കോവിഡ് സ്ഥിരീകരിച്ച താരങ്ങളുടെ പേര് വിവരങ്ങൾ പുറത്തു വിട്ടത്. തങ്ങളുടെ ടീമിലെ മൂന്ന് അംഗങ്ങൾക്ക് കോവിഡ് സ്ഥിരീകരിച്ചിരിക്കുന്നു എന്നാണ് പിഎസ്ജി തങ്ങളുടെ ട്വിറ്റെർ വഴി പുറത്തു വിട്ടത്. എന്നാൽ ആരാണ് എന്ന് പിഎസ്ജി ഔദ്യോഗികമായി സ്ഥിരീകരിച്ചിട്ടില്ല. പക്ഷെ പുറത്തു വരുന്ന വിശ്വസനീയമായ റിപ്പോർട്ടുകൾ പ്രകാരം ഈ മൂന്ന് താരങ്ങൾ നെയ്മർ, ഡിമരിയ, പരേഡസ് എന്നിവരാണ് എന്നാണ് അറിയാൻ കഴിയുന്നത്.

ഈ മൂന്ന് താരങ്ങളും ഇബിസയിൽ തങ്ങളുടെ അവധിദിനങ്ങൾ ആഘോഷിച്ചിരുന്നു. അതിന് ശേഷം പിഎസ്ജിയിൽ തിരിച്ചെത്തുകയായിരുന്നു. തുടർന്ന് നടത്തിയ പരിശോധനയിൽ ആണ് ഈ മൂന്ന് പേർക്കും കോവിഡ് സ്ഥിരീകരിച്ചത് എന്നാണ് എൽ എക്വിപെ പറയുന്നത്. ഇതിനെ തുടർന്ന് ഒരാഴ്ച്ചക്ക് മുകളിൽ ഇവർ സെൽഫ് ഐസൊലേഷനിൽ പോവും എന്നാണ് പ്രാഥമികവിവരങ്ങൾ. പിഎസ്ജിയിൽ ഉള്ള മിക്ക താരങ്ങളും നിലവിൽ തങ്ങളുടെ നാഷണൽ ടീമിനോടൊപ്പമാണ് ഉള്ളത്. എന്നാൽ യൂറോപ്പിലെ രാജ്യങ്ങൾക്ക് പുറത്തുള്ളവർക്ക് ഇന്റർനാഷണൽ ഡ്യൂട്ടി ഇല്ല. ഇതിനാലായിരുന്നു ഈ മൂവരും അവധി ആഘോഷിക്കാൻ പോയത് എന്നാണ് അറിയാൻ കഴിയുന്നത്. സെപ്റ്റംബർ പത്തിന് ലെൻസിനെതിരെയാണ് പിഎസ്ജിയുടെ ലീഗ് വണ്ണിലെ ആദ്യ മത്സരം. ഈ മത്സരത്തിന് ഇവരുടെ സേവനം ലഭ്യമാവുമോ എന്ന് പറയാനായിട്ടില്ല.