നെയ്മറുടെ കാര്യത്തിൽ ദുഃഖമുണ്ട് : പോച്ചെട്ടിനോ!

ലീഗ് വണ്ണിലെ 16-ആം റൗണ്ട് പോരാട്ടത്തിൽ വമ്പൻമാരായ പിഎസ്ജി ഇന്ന് കളത്തിലേക്കിറങ്ങുന്നുണ്ട്. ഇന്ന് രാത്രി ഇന്ത്യൻ സമയം 1:30-ന് നീസിനെയാണ് പിഎസ്ജി നേരിടുക. പിഎസ്ജിയുടെ മൈതാനമായ പാർക്ക് ഡെസ് പ്രിൻസസിൽ വെച്ചാണ് മത്സരം നടക്കുക.

ഈ മത്സരത്തിൽ സുപ്പർ താരം നെയ്മർ ജൂനിയർക്ക് കളിക്കാൻ സാധിക്കില്ല. കഴിഞ്ഞ സെന്റ് എറ്റിനിക്കെതിരെയുള്ള മത്സരത്തിൽ നെയ്മറുടെ ആങ്കിളിന് ഗുരുതരമായി പരിക്കേറ്റിരുന്നു. ആറ് മുതൽ എട്ട് ആഴ്ച്ചകൾ വരെ നെയ്മർ പുറത്തിരിക്കേണ്ടി വരുമെന്നാണ് മെഡിക്കൽ റിപ്പോർട്ട്‌ സൂചിപ്പിക്കുന്നത്.

ഏതായാലും നെയ്മറുടെ കാര്യത്തിൽ പോച്ചെട്ടിനോ ദുഃഖം രേഖപ്പെടുത്തിയിട്ടുണ്ട്. മത്സരത്തിന് മുന്നോടിയായുള്ള പത്രസമ്മേളനത്തിൽ സംസാരിക്കുകയായിരുന്നു അദ്ദേഹം.

” തീർച്ചയായും നെയ്മറുടെ കാര്യത്തിൽ ദുഃഖമുണ്ട്.കാരണം ഫുട്ബോൾ കളിക്കാൻ വളരെയധികം ഇഷ്ടപ്പെടുന്ന ഒരു താരമാണ് അദ്ദേഹം.നെയ്മറുടെ പകരക്കാരനെ കണ്ടെത്താൻ ഞങ്ങൾ ശ്രമിക്കില്ല. മറിച്ച് ടാക്ടികൽ ബാലൻസിന് ആവിശ്യമായ പരിഹാരം ഞങ്ങൾ കാണേണ്ടിയിരിക്കുന്നു ” പോച്ചെ പറഞ്ഞു.