മാഡ്രിഡ്‌ ക്ലബുകളിലേക്കില്ല, സിറ്റിയോ പിഎസ്ജിയോ? കളിക്കാനാഗ്രഹിക്കുന്ന സ്ഥലം വെളിപ്പെടുത്തി മെസ്സി !

സൂപ്പർ താരം ലയണൽ മെസ്സി സ്പാനിഷ് മാധ്യമമായ ലാ സെക്സ്റ്റക്ക്‌ ഒരു ദീർഘമായ അഭിമുഖം നൽകിയിരുന്നു. സ്പാനിഷ് ജേണലിസ്റ്റ് ആയ ജോർദി ഇവോളയായിരുന്നു മെസ്സിയുമായി അഭിമുഖം നടത്തിയിരുന്നത്. ഈ അഭിമുഖത്തിലാണ് മെസ്സി മാഡ്രിഡ്‌ ക്ലബുകളിലേക്ക് ഒരിക്കലും കൂടുമാറില്ലെന്ന് ഉറപ്പിച്ചു പറഞ്ഞത്. റയൽ മാഡ്രിഡ്‌, അത്‌ലെറ്റിക്കോ മാഡ്രിഡ്‌ എന്നീ ക്ലബുകളിൽ കളിക്കാൻ ആഗ്രഹിക്കുന്നില്ല എന്നാണ് മെസ്സി തുറന്നു പറഞ്ഞത്.അത്‌ലെറ്റിക്കോ മാഡ്രിഡിനോ റയൽ മാഡ്രിഡിനോ വേണ്ടി കളിക്കുമോ എന്ന ചോദ്യത്തിന് ” അസാധ്യം ” എന്നാണ് മെസ്സി മറുപടി പറഞ്ഞത്. മെസ്സിയുടെ സുഹൃത്തായ ലൂയിസ് സുവാരസ് ഈ സമ്മർ ട്രാൻസ്ഫറിൽ അത്‌ലെറ്റിക്കോ മാഡ്രിഡിലേക്ക് ചേക്കേറിയിരുന്നു.

അതേസമയം മാഞ്ചസ്റ്റർ സിറ്റിയിലേക്കാണോ പിഎസ്ജിയിലേക്കാണോ ചേക്കേറാൻ ഉദ്ദേശിക്കുന്നത് എന്ന ചോദ്യത്തിനും മെസ്സി മറുപടി പറഞ്ഞു. നിലവിൽ രണ്ടിലേക്കുമില്ല എന്ന രൂപത്തിലാണ് മെസ്സി സംസാരിച്ചത്. വളരെ വിദഗ്ദമായായിരുന്നു ഈ ചോദ്യം ജോർദി ഉന്നയിച്ചത്. ഞാൻ മാഞ്ചസ്റ്ററിലേക്കും പാരീസിലേക്കും രണ്ട് ടൂർ ഗൈഡുകളെ ഓഫർ ചെയ്താൽ ഏതിനെ തിരഞ്ഞെടുക്കുമെന്നായിരുന്നു ജോർദിയുടെ ചോദ്യം. എന്നാൽ മെസ്സി അതിന് മറുപടി പറഞ്ഞത് ഇങ്ങനെയാണ്. ” ആ ടൂർ ഗൈഡുകളെ നിങ്ങൾ തന്നെ വെച്ചോളൂ. ബാഴ്സലോണയിൽ ഞാൻ തുടരണമെന്ന് ആഗ്രഹിക്കുന്ന ഒട്ടേറെ ആളുകളും ആരാധകരമുണ്ട്. അത്കൊണ്ട് തന്നെ ഞാൻ ക്ലബ്ബിനും എനിക്കും നല്ലത് എന്താണോ അതാണ് ഞാൻ പ്രവർത്തിക്കുക. എനിക്ക് സംശയങ്ങളൊന്നുമില്ല. എന്റെ ഹൃദയവും തലയും എന്താണ് പറയുന്നത് എന്നെനിക്കറിയാം ” മെസ്സി പറഞ്ഞു.

അതേസമയം അമേരിക്കയിലെ എൽഎൽഎസ്സിൽ കളിക്കാൻ ആഗ്രഹമുണ്ടെന്ന് മെസ്സി തുറന്നു പറഞ്ഞു. ” എനിക്ക് ബാഴ്‌സയിലേക്ക് തന്നെ തിരികെ എത്തണം. ഞാൻ എന്റെ കരിയർ അവസാനിപ്പിച്ചാൽ ബാഴ്സലോണയിൽ തന്നെ തുടരാൻ ആഗ്രഹിക്കുന്നണ്ട്. ബാഴ്‌സയിലേക്ക് തിരികെ എത്താണമെന്ന് പറയാൻ കാരണം ഞാൻ അമേരിക്കയിൽ ജീവിക്കാൻ ആഗ്രഹിക്കുന്നു. അവിടുത്തെ ചാമ്പ്യൻഷിപ്പായ എംഎൽഎസ് കളിക്കാൻ ആഗ്രഹിക്കുന്നു. പക്ഷെ എന്താണ് ഭാവിയിൽ സംഭവിക്കുക എന്ന് പറയാനൊക്കില്ല ” മെസ്സി പറഞ്ഞു.