ബെസ്റ്റ് ഇൻ ദി വേൾഡ് :വിനീഷ്യസിനെ കുറിച്ച് തിയറി ഹെൻറി!

കഴിഞ്ഞ ചാമ്പ്യൻസ് ലീഗ് മത്സരത്തിൽ ചെൽസിക്കെതിരെ തകർപ്പൻ വിജയം നേടാൻ റയൽ മാഡ്രിഡിന് കഴിഞ്ഞിരുന്നു.എതിരില്ലാത്ത രണ്ടു ഗോളുകൾക്കായിരുന്നു അവരെ പരാജയപ്പെടുത്തിയത്. മത്സരത്തിൽ മികച്ച പ്രകടനമാണ് ബ്രസീലിയൻ സൂപ്പർതാരമായ വിനീഷ്യസ് ജൂനിയർ പുറത്തെടുത്തത്. രണ്ട് ഗോളുകൾക്കും അസിസ്റ്റ് നൽകിയത് ഇദ്ദേഹമായിരുന്നു. മത്സരത്തിലെ പ്ലെയർ ഓഫ് ദി മാച്ച് പുരസ്കാരവും വിനീഷ്യസ് സ്വന്തമാക്കിയിരുന്നു.

ഈ മത്സരത്തിനുശേഷം വിനീഷ്യസിനെ കുറിച്ച് തിയറി ഹെൻറി ചില കാര്യങ്ങൾ പറഞ്ഞിട്ടുണ്ട്. അതായത് നിലവിലെ ലോകത്തിലെ ഏറ്റവും മികച്ച ലെഫ്റ്റ് വിങ്ങർ വിനീഷ്യസ് ജൂനിയറാണ് എന്നാണ് ഈ ഫ്രഞ്ച് ഇതിഹാസം പറഞ്ഞിട്ടുള്ളത്.മത്സരത്തിൽ വിനീഷ്യസ് കുക്കിങ് നടത്തുകയായിരുന്നുവെന്നും ഹെൻറി കൂട്ടിച്ചേർത്തു. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട് ചെയ്യുന്നത് ഇങ്ങനെയാണ്.

“ഇന്ന് ലോകത്തെ ഏറ്റവും മികച്ച ലെഫ്റ്റ് വിങ്ങർ വിനീഷ്യസ് ജൂനിയറാണ്.ആഴ്സനലിൽ ഗബ്രിയേൽ മാർട്ടിനെല്ലി ഉണ്ട് എന്നുള്ള കാര്യം മറക്കുന്നില്ല.പക്ഷേ അദ്ദേഹം വരുന്നതേയുള്ളൂ.താൻ എന്താണ് ചിന്തിക്കുന്നത് അത് കൃത്യമായി പ്രവർത്തിക്കാൻ വിനീഷ്യസിന് സാധിക്കുന്നു.റീസ് ജെയിംസിനെ പരാജയപ്പെടുത്തിയത് അങ്ങനെയാണ്.വളരെയധികം ചിന്തിച്ചുകൊണ്ട് കാര്യങ്ങൾ ചെയ്യാൻ അദ്ദേഹത്തിന് സാധിക്കുന്നു.വിനീഷ്യസിന്റെ കൈവശം പന്തുണ്ടെങ്കിൽ എനിക്കത് ഫീൽ ചെയ്യാൻ കഴിയും. അദ്ദേഹം അത് കുക്ക് ചെയ്യുകയാണ്. കഴിഞ്ഞ രണ്ടു വർഷമായി സ്ഥിരതയാർന്ന പ്രകടനം നടത്താൻ ഈ ബ്രസീലിയൻ താരത്തിന് കഴിയുന്നുണ്ട് ” ഇതാണ് തിയറി ഹെൻറി പറഞ്ഞിട്ടുള്ളത്.

ചാമ്പ്യൻസ് ലീഗ് സീസണിൽ ഏറ്റവും കൂടുതൽ ഗോൾ പങ്കാളിത്തങ്ങൾ വഹിച്ച താരങ്ങളിൽ ഒരാളാണ് വിനീഷ്യസ് ജൂനിയർ.ആറ് ഗോളുകളും 5 അസിസ്റ്റുകളും അദ്ദേഹം നേടിയിട്ടുണ്ട്. ഈ സീസണിൽ ആകെ 21 ഗോളുകളും 16 അസിസ്റ്റുകളും ആണ് താരം കരസ്ഥമാക്കിയിട്ടുള്ളത്.