ബാഴ്സലോണ ക്യാപ്റ്റനെ റയൽ മാഡ്രിഡ്‌ റാഞ്ചി!

എഫ്സി ബാഴ്സലോണയുടെ യൂത്ത് ടീം നായകനും സ്ട്രൈക്കറുമായ ജൗമേ ജാർദിയെ ചിരവൈരികളായ റയൽ തങ്ങളുടെ തട്ടകത്തിലെത്തിച്ചു.സ്പാനിഷ് മാധ്യമങ്ങൾ എല്ലാം തന്നെ ഇക്കാര്യം റിപ്പോർട്ട്‌ ചെയ്തിട്ടുണ്ട്.ബാഴ്‌സയുടെ യൂത്ത് ടീമിനൊപ്പം അഞ്ച് സീസണുകൾ ചിലവഴിച്ച താരമാണ് ജാർദി.2016/17-ലാണ് ഇദ്ദേഹത്തെ ബാഴ്സ സൈൻ ചെയ്തിരുന്നത്.കഴിഞ്ഞ സീസണിൽ ബാഴ്‌സ യൂത്ത് ടീമിന്റെ നായകനായിരുന്നു ഇദ്ദേഹം.

2019/20 സീസണിൽ മിന്നും പ്രകടനത്തോടെ ടീമിന്റെ ടോപ് സ്‌കോററാവാൻ ജാർദിക്ക്‌ കഴിഞ്ഞിരുന്നു.എന്നാൽ കഴിഞ്ഞ സീസണിൽ താരത്തിന് വേണ്ട വിധത്തിൽ തിളങ്ങാൻ കഴിഞ്ഞിരുന്നില്ല.ഒമ്പത് ഗോളുകളും 3 അസിസ്റ്റുകളുമായിരുന്നു താരത്തിന്റെ സമ്പാദ്യം.ഈ സീസണിൽ താരം ഫ്രീ ഏജന്റായിരുന്നു. ഇതോടെ ബാഴ്‌സയുമായി കരാർ പുതുക്കാതെ താരം റയലിലേക്ക് ചേക്കേറുകയായിരുന്നു. റൗൾ ഗോൺസാലസ് പരിശീലിപ്പിക്കുന്ന റയലിന്റെ ബി ടീമിലാണ് താരം ഇനി കളിക്കുക.രണ്ട് താരങ്ങളെ ഇതിനോടകം തന്നെ ബാഴ്‌സയുടെ യൂത്ത് ടീമിന് നഷ്ടമായിരുന്നു.സെന്റർ ബാക്കായ ഹോസെ മരിയ സ്പോർട്ടിങ് ലിസ്ബണിലെക്ക് ചേക്കേറിയിരുന്നു.മറ്റൊരു താരമായ ഡിയഗോ ലോപസ് വലൻസിയയിലേക്കും കൂടുമാറിയിരുന്നു.