വേൾഡ് കപ്പ് കിരീടം മെസ്സി ഉയർത്തും, അത് നേരത്തെ എഴുതപ്പെട്ടതാണ്: സ്ലാട്ടൻ ഇബ്രാഹിമോവിച്ച്!

ഖത്തർ വേൾഡ് കപ്പിന്റെ കലാശ പോരാട്ടത്തിൽ അർജന്റീനയും ഫ്രാൻസും തമ്മിലാണ് ഏറ്റുമുട്ടുക.വരുന്ന ഞായറാഴ്ചയാണ് ഈ മത്സരം നടക്കുക. ലയണൽ മെസ്സിയെ സംബന്ധിച്ചിടത്തോളം തന്റെ കരിയറിലെ ആദ്യ വേൾഡ് കപ്പ് കിരീടം നേടാനുള്ള സുവർണ്ണാവസരമാണ് ലഭിച്ചിട്ടുള്ളത്. അതേസമയം ഫ്രഞ്ച് പടയാകട്ടെ വേൾഡ് കപ്പ് കിരീടം നിലനിർത്താനുള്ള ശ്രമത്തിലുമാണ്.

ഇപ്പോഴിതാ ലയണൽ മെസ്സി തന്നെ കിരീടം നേടുമെന്നുള്ള പ്രസ്താവനയുമായി സൂപ്പർ താരം സ്ലാട്ടൻ ഇബ്രാഹിമോവിച്ച് രംഗത്ത് വന്നിട്ടുണ്ട്. വേൾഡ് കപ്പ് കിരീടം മെസ്സി ഉയർത്തുമെന്നും അത് നേരത്തെ തന്നെ എഴുതപ്പെട്ടതാണ് എന്നുമാണ് സ്ലാട്ടൻ പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട്‌ ചെയ്യുന്നത് ഇങ്ങനെയാണ്.

” ആരായിരിക്കും ഈ വേൾഡ് കപ്പ് കിരീടം നേടുക എന്നുള്ളത് നേരത്തെ തന്നെ എഴുതപ്പെട്ട ഒരു കാര്യമാണ്. ഞാൻ ആരെയാണ് ഉദ്ദേശിച്ചിട്ടുള്ളത് എന്നുള്ളത് നിങ്ങൾക്ക് മനസ്സിലായിക്കാണും.ഇത്തവണത്തെ വേൾഡ് കപ്പ് കിരീടം, അത് ലയണൽ മെസ്സിക്ക് ഉള്ളതാണ്.അദ്ദേഹം തന്നെ അത് ഉയർത്തും. അത് നേരത്തെ എഴുതപ്പെട്ടതാണ് ” ഇതാണ് സ്ലാട്ടൻ പറഞ്ഞിട്ടുള്ളത്.

ലയണൽ മെസ്സി കിരീടം നേടാൻ ആഗ്രഹിക്കുന്നുവെന്ന് നേരത്തെ തന്നെ സ്ലാട്ടൻ വ്യക്തമാക്കിയിരുന്നു.മെസ്സിക്കൊപ്പം ബാഴ്സയിൽ വച്ച് ഒരുമിച്ച് കളിച്ചിട്ടുള്ള വ്യക്തി കൂടിയാണ് സ്ലാട്ടൻ.2014 ലെ വേൾഡ് കപ്പ് ഫൈനലിൽ അർജന്റീന ഉണ്ടായിരുന്നുവെങ്കിലും ജർമ്മനിയോട് പരാജയപ്പെട്ടതോടുകൂടി ആ കിരീടം നഷ്ടമാവുകയായിരുന്നു. എന്നാൽ ഇത്തവണ അത് കൈപിടിയിലൊതുക്കാൻ കഴിയുമെന്നാണ് ആരാധകർ വിശ്വസിക്കുന്നത്.