വേൾഡ് കപ്പിലെ മികച്ച പ്രകടനത്തിന്റെ ക്രെഡിറ്റ് അദ്ദേഹത്തിന് : വിനീഷ്യസ് പറയുന്നു.

കഴിഞ്ഞ സൗത്ത് കൊറിയക്കെതിരെയുള്ള പ്രീ ക്വാർട്ടർ മത്സരത്തിൽ മിന്നുന്ന വിജയം നേടാൻ ബ്രസീലിന് സാധിച്ചിരുന്നു. ഒന്നിനെതിരെ നാലു ഗോളുകൾക്കായിരുന്നു ബ്രസീൽ ആ മത്സരത്തിൽ വിജയിച്ചത്. സൂപ്പർ താരം വിനീഷ്യസ് ജൂനിയർ മികച്ച പ്രകടനമാണ് മത്സരത്തിൽ പുറത്തെടുത്തത്. ഒരു ഗോളും ഒരു അസിസ്റ്റും സ്വന്തമാക്കാൻ വിനീഷ്യസിന് സാധിച്ചിരുന്നു.

ഏതായാലും തന്റെ ഈ മികച്ച പ്രകടനത്തിന് ഏറ്റവും കൂടുതൽ സഹായിച്ചത് റയൽ മാഡ്രിഡിന്റെ പരിശീലകനായ കാർലോ ആഞ്ചലോട്ടിയാണ് എന്നുള്ള കാര്യം ഇപ്പോൾ വിനീഷ്യസ് തുറന്നു പറഞ്ഞിട്ടുണ്ട്. മാത്രമല്ല ആഞ്ചലോട്ടിയും ടിറ്റെയും തമ്മിൽ ഒരുപാട് സാമ്യതകൾ ഉണ്ടെന്നും വിനീഷ്യസ്‌ കൂട്ടിച്ചേർത്തിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

” ഞാൻ ആഞ്ചലോട്ടിയുമായി സംസാരിച്ചിരുന്നു.അദ്ദേഹം ഒരുപാട് ഉപദേശങ്ങൾ എനിക്ക് നൽകിയിരുന്നു.ബ്രസീലിൽ സ്റ്റാർട്ടർ ആവാൻ അദ്ദേഹത്തിന്റെ ഉപദേശങ്ങൾ എനിക്ക് തുണയായിട്ടുണ്ട്.അദ്ദേഹം ഒരുപാട് കോൺഫിഡൻസ് എനിക്ക് നൽകിയിട്ടുണ്ട്. എന്നെ സംബന്ധിച്ചിടത്തോളം അദ്ദേഹം പിതൃതുല്യനാണ്. താരങ്ങളെ കൈകാര്യം ചെയ്യുന്നതിലും അദ്ദേഹം മികച്ച ഒരു വ്യക്തിയാണ്.ഞാൻ ഇമ്പ്രൂവ് ആയതിൽ ഒരുപാട് സഹായങ്ങൾ നൽകിയത് ആഞ്ചലോട്ടിയാണ്. അദ്ദേഹവും ബ്രസീലിന്റെ പരിശീലകനായ ടിറ്റെയും തമ്മിൽ ചില സാമ്യതകൾ ഉണ്ട്. രണ്ടുപേരും ഒരുപാട് സമയം പരസ്പരം സംസാരിക്കാറുമുണ്ട് ” ഇതാണ് വിനീഷ്യസ് പറഞ്ഞിട്ടുള്ളത്.

ക്വാർട്ടർ ഫൈനലിൽ ബ്രസീലിന്റെ എതിരാളികൾ ക്രൊയേഷ്യയാണ്.വിനീഷ്യസ് ജൂനിയർ തന്റെ മികവ് ആവർത്തിക്കുമെന്നാണ് ആരാധകർ പ്രതീക്ഷിക്കുന്നത്.